我的爸媽與未來奶奶

我想, 我和男友都是幸福的。

由開始籌備婚禮以來, 無論擇日、選酒席、選證婚場地, 甚至過大禮物品, 爸媽與未來奶奶總是由得我們自行決定, 絕不是我們不問他們意見, 而是問過他們後, 他們的意思是只要我們喜歡, 他們亦無所謂, 所以那些「兩個月才擇好日子酒席又要所有長老過目同意於是拖好久好久才可落實結婚日期地點」的情況都沒有在我們身上出現。

我們兩家人都如此沒所謂, 但身邊總有些三姑六婆給予很多「意見」, 常聽說有些長老起初口頭說什麼也沒所謂,  但聽完身邊的「諫言」後便又要這樣又要那樣~ 我父母對這方面的「免疫力」都很高, 昨晚就親耳聽到我媽和親戚的電話對話(當然我是從我媽的說話猜對方在說什麼)︰

親戚︰咁早過大禮？

媽︰係呀, 方便佢地派帖嘛, 佢地唔係成日都約到朋友出黎嘛, 早啲咪多啲時間派帖囉...

親戚︰咁...過大禮都好多野搞喎...

媽︰我地無野搞呀~ 有咩搞呀？

親戚︰又要xxx, 又要xxx, 同xxxx...

媽︰我地都唔鍾意果啲繁文縟節, 咩海味呀、京果呀、茶呀...全部用包羅萬有利是代替就得啦~ 買對椰子係度又唔食得, 放係屋企等佢發毛喎...哈哈哈...唔好嘞~ 我地都係一切從簡...

親戚︰下？﹗我見我阿邊個邊個過大禮會咁咁咁架喎...

媽︰你估係以前啲人咩, 16, 18歲就結婚, 咩都唔識, 咁梗係父母幫佢搞啦, 佢地咁大個, 見識多過我地好多啦... 我地都無謂差隻腳落去令啲後生難做嘛...

親戚︰咁親家果邊呢？

媽︰佢又係無所謂架喎, 好似擇日咁, 都話問下小草父母想點啦... 我地都由得啲後生自己搞啦...

親戚︰咁收幾錢禮金呀？

媽︰我地唔使喎, 又唔係賣女... (親戚︰xxxxx......) 咁買金呢啲野又係自己隨心啫... 我年頭時個仔結婚已經順便買埋啦...blablabla....

聽到媽媽好努力地「捍衛」我們家的「沒所謂做法」, 表面上我雖然沒有什麼, 但心裡很是感動的, 亦很感恩有對愛錫我們的父母和奶奶。