恩典滿瀉 之 小小B出生經過

當年生小B由陣痛到生完用左6個鐘~ 我形容為"恩典滿滿"既生B經過~

今次生小小B, 唔止恩典滿滿, 而係滿瀉!!

入閘!

4/1按醫院約期入院, 雖然醫院約8點, 但我地送左阿仔返學先, 到產前房都已經8點9~

先係換醫院衫, 駁機聽bb心跳, 再等醫生檢查~

醫生大約10點左右黎check子宮頸(果下痛到呢... >.<), 話宮頸唔算硬亦唔算軟, 但比較長... 佢都係建議塞催生藥~ 問醫生塞完藥會幾時有反應, 醫生話... 大部分人都要過一晚先有反應, 只有小部分會塞藥後幾個鐘作動穿水... 聽完佢講之後真係心都涼左一截... 咁咪即係有排都未生得?! -_-""

再問醫生我上胎吊催生針個半鐘就生左, 咁塞藥會唔會都快? 醫生既答案係... 唔關事, 因為塞藥係令子宮頸變軟, 同吊催生針係兩回事, 催生針係作動之後既事...

咁即係, 今次係唔係似上胎咁快都真係好難講...

當下果刻都有定心理準備要係產前房起碼住一晚先生得... -_-"

點都好, 食飽先算... 朝早太匆忙早餐都未食, 叫陳老公買左個大早餐, 同姑娘講食完早餐先塞藥, 心諗, 食飽d如果咁好彩真係生得都有力嘛~

11點左右塞藥, 之後就要再駁機兩個鐘聽bb心跳~

開跑!

12點左右, 我開始feel到少少陣痛感覺, 但都唔太肯定係唔係真係陣痛... 定腸痛? 因為同時有少少想開大既感覺... 其實陣痛同肚痛初時都真係幾難分... XD

同時陳老公就入左黎病房"探病"嘞...

無聊時就研究下部心跳機... 發現, 每次我陣痛時d顯示宮縮強度嘅數字就會高左（應該係, 順粹斷估）... 高到90+, 甚至100+... 記得生阿仔果時陣痛最高數字係70+... 咁依家咪仲痛過生阿仔果時?! 但其實我又覺得未算好痛~ 當時痛嘅密度已經係分幾兩分鐘一次...

1點左右, 駁機完畢~ 姑娘睇record, 話我痛得好密, 問我係唔係好痛~ 但其實我都係一般程度既痛而已, 只係想開大既感覺愈來愈密... 跟住佢又問我使唔使check下開左未... 果時我好想去vv, 就話去完洗手間先check, 姑娘仲提我千祈唔好以為係想開大而用力痾... XXDDD

去完洗手間返黎check, 一心以為點都開左少少啦, 點知姑娘檢查完就話一度都未開... -_-" 唯一進步既係宮頸短左少少... 俾姑娘check完就開始有少少血流出黎~~

姑娘叫我當"成個肚都痛"時就通知佢, 但我雖然生過, 都分唔清點樣先係"成個肚都痛"~

又繼續等~~

果時兩點幾, 我叫陳老公不如返屋企抖下, 諗住真係生得佢飛的士過黎都趕得切既~ 不過陳老公話費事一來一回嘞, 反正我未生得既話佢都要5點黎到探我...

等既時候愈痛愈密, 亦愈來愈痛...

又再過左一個鐘左右, 痛得厲害左, 於是又叫姑娘再check....

仍然係一度未開... >.<

果刻真係有一秒諗, 如果開刀咪唔使捱囉...

跟住姑娘就話醫生睇完bb心跳記錄, 就話bb心跳快左d, 要再駁機聽心跳~

轉入大直路!

駁左一陣, 我諗唔多過十分鐘... 突然, 我感覺有少少暖流湧出!! 生過既就知, 穿水嘞!!

終於有d跡象, 心裡暗喜~~~

即刻call姑娘再check~ 姑娘話我果d唔係穿水, 係血咋喎... (事後就知根本果刻係穿水, 只不過唔係流得好勁...)

失望... 點知姑娘話我已開左一度, 可以上產房啦~~ yeah~~

再問姑娘, 上產房係咪可以吊催生針? (一心諗住照辦煮碗似生阿仔果時吊催生針咁就可以快d...) 點知姑娘話, 你已經開左一度, 唔會吊催生針架嘞, 等你慢慢開~

下? 無得吊針?! 依家先一度, 幾時先開哂呀... >.< 仲要果時我已經覺得有幾下痛到要吸笑氣先頂到 (但未上產房係無笑氣既...)~

好在唔使等, 嬸嬸好快黎俾左紫袍我換, 極速就推左張床過黎同我上產房~

知道有得上產房就即刻打俾陳老公~ (好在佢決定唔走啫!)

姑娘同嬸嬸用極速推我上產房, 一出病房就見陳老公係遠處既長椅做低頭族... 做咩唔係企係門口等架?! >.<

我大聲叫佢, 姑娘見到都即刻再幫我行過去叫佢, 同時, 張床繼續"跑"緊...

陳老公跟上之後, 我話俾陳老公知依家先開左一度咋, 我地兩個都覺得應該有排先生得... >.<

好快就到產房~ 陳老公要係出面等幾分鐘等我settle左先入得黎~

今次係4號產房, 單人既, 即係唔會學上次咁啦~ (上次阿仔係雙人產房, 聯針時有另一名產婦入左黎, 陳老公就要出去~)

衝線啦~~

入到去, 嬸嬸幫我過床...

神奇既一刻黎嘞~~

我個pat一掂到產床果刻就好想生!!

於是都不顧儀態不斷問周圍既姑娘我係唔係"痾得"??? (果刻我堅係覺得用呢個詞語先可以明確表達我既意思!! XD)

佢地話係, 我可以生嘞 (真係?!), 但又叫我忍住...

一次又一次confirm我無心臟病哮喘blablabla之後, 就幫我移好位置, 俾左幾啖笑氣我吸, 之後姑娘就話「你可以盡情痾嘞~」(XXXDDD) , 叫我聽指示試下push...

呢個時候, 陳老公都未入黎...

push左一陣, 陳老公入黎, 再push左幾下... 聽到小小b既喊聲嘞~~ 今次陳老公仲可以親自剪臍帶添~~

生完之後我忍唔住喊左兩下, 同講左句「痴線」XXDDD... 因為無諗過快得咁緊要, 成件事實在太crazy啦~~ 痴線之後當然係感謝神!! 幫我生既助產士形容我係「即食麵」, 哈哈~~ 今次都係剪唔切就生左... XD 不過今次聯針好快手, 亦唔係好痛~ 無雙非果然好好多, 今次生完可以同陳老公一齊係產房陪BB一個鐘, 唔會好快咁被趕走~ =]

由發現開一度到小小b出世, 大概係20分鐘左右~! 有陣痛感覺到生完, 只係4個鐘多d~ 陳老公都估我唔到, 明明入產房時仲係一度, 好奇怪姑娘猛催佢換衫換快d, 原來入到黎我已生左一半... 原本以為係長跑賽, 原來係超短跑!! XD~

依家諗返起都仲覺得好不可思議, 恩典滿瀉!! 神既安排真係好奇妙!! 當初醫院話小小b細粒要我入院催生我覺得有d唔合理, 事實上小小b出世既磅數比當年小b還要重, 但當年小b都係自然作動先入院, 但如果小小b等我穿水先入院, 恐怕我落到屋企樓下已經生得都似... 只係想象都覺得驚險~

鉅細無遺地寫下生小小b經過, 因為第二次生產同樣難忘!! 而且99.99%係我最後一次大肚, 當然要好好記低佢等自己將來唔會忘記~ 如果你有心睇到呢度, 相信你一定係好關心小草既人, 多謝你呀!! =]