小小B 之 又俾"驚喜"阿媽

Date back to 23.12.2015 @ 36W4D

之前胎水少, QE安排左我22.12冬至果日再去產檢~ 但亦因為咁去唔到小B既學校聖誕party... >.<

今次產檢真係做哂"全套"檢查... 照超聲波+駁機聽BB心跳+B鏈檢查+見醫生...

一次過做咁多野真係抵哂.... -_-"

上次私家產檢完話我胎水量正常返, 我都大安旨意諗住今次產檢都係循例做下無咩大問題...

上到B3先聽BB心跳半個鐘同時記錄胎動~

陀小B時都用過部胎心機做檢查, 上次係坐係度做, 今次係瞓係度...

好奇問下幫我駁機既姐姐兩部機有咩分別~ 佢好體貼地話我知因為我之後要做B鏈檢查, 護士唔想我坐完之後又要瞓上床咁勞動, 所以一開始就安排我瞓係度做! 兩部機其實係一樣既!!

真心覺得佢地好體貼, 知我地D大肚婆瞓係度會腰骨痛仲俾埋個枕頭我墊背...

但我瞓完果半個鐘都係腰骨痛... 而且做B鏈時個人都要起少少身黎除褲... =P 其實我真係唔介意先坐係度然後再瞓上床囉... XXDDD 不過都真心欣賞佢地既考量同體貼安排~

聽完胎心亦記錄到小小B好活躍應該無問題~

之後護士好快手幫我做埋B鏈, 又出去等照超聲波嘞~

入到去超聲波房... 成4, 5個醫護人員係度...

先係一個後生女仔同我照... 度小小B頭圍同肚圍... 見佢粒聲唔出小心奕奕咁既樣, 同平時會自動同我講解既醫護人員有D唔同, 估佢應該係實習學生... 所以我都只係靜靜咁睇住個mon無問佢野~ 心諗, 第日到我個女要生B時, 呢位實習醫生可能已成為expert睇我阿女嘞... 做左媽媽後有時真係諗得太遠... XXDDD

佢都照左一陣先收手~ 之後就好安靜咁行開再俾後面年紀大既男醫生接手再照~

好明顯呢個係老師啦...

男醫生左照右照, 都有講解下俾我聽, 都係話BB細size但可以接受~

可能有實習學生係度, 佢照得好仔細咁... 之後係咁照小小B頭部既某一個部分, 個mon show到又紅又藍既顏色... 以我所知應該係血流量... 不過唔知佢為咩係咁照果度照左幾次, 仲叫我打側身瞓等佢照清楚D...

照照下都有少少擔心... 點解係咁照佢個腦... >.<

跟住佢話小小B個腦既血流量多左少少... 我問佢咁即係代表咩... 佢答我可能係營養不良!!

咁即係點呀?! -_-""

之後又幫我度胎水量, 正常無問題~

然後照個胎盤俾我睇... 話見唔見到白白地色既部分...

跟住佢又話我知, 我個胎盤開。始。鈣。化!!!

下... 唔係掛...

之前都有聽過下胎盤鈣化呢樣野, 不過唔太清楚係咩, 只知道咁係代表個胎盤function唔到, 即係話要早D生個B出黎!!

照完起身埋位再逐樣問醫生...

~~~ 腦既血流量比較多代表咩? 會有咩影響??

醫生睇完一堆chart之後答: 其實都係多少少, 係可接受程度blablabla...

我依家覆述唔返佢講過咩, 但以我理解, 血流量多即係可能個腦唔夠養份所以要泵多D血上去... 醫生好似話係... anyway, 總之可接受就好, 亦唔會有咩大影響或後遺症就好...

~~~ 胎盤鈣化會點?

醫生話我都係「開始」鈣化啫, 唔係即刻有問題, 叫我plan定38W左右就入醫院催生....

我再問醫生, 佢會依家寫紙俾埋催生期我定點? (如果係我就request 佢1月1號之後啦梗係~ XD)

佢跟住就話都係plan住先, 可以同先生商量下~ 下次返黎產檢聽下胎心再睇下個情況再決定~

見完醫生就出去等攞約期紙嘞~

下次再去QE檢查係29.12...

希望阿女乖乖地, 唔好要我係29號檢查完就即刻入院催生啦... 等多兩日到2016先!!

至於"催生"呢部分, 我反而覺得咁幾好~ 生小B時吊左催生針個半鐘就生左, 所以如果今次都係催生, 估計應該可以好快手... 咁就好嘞, 唔使痛咁耐~ =P

而且如果跟醫院俾既期催生, 咁就唔使怕突然作動要趕去醫院同時又要係最短時間內安置小B嘞(因為小B放梗聖誕假而陳老公又要返工呢~~)...

至於胎盤鈣化... 我產檢完後即刻好勤力咁上網search相關資料...

呢度講得好詳細, 有興趣自己睇 -->
http://www.mombaby.com.tw/article/胎盤鈣化　一定要催生嗎？

睇完之後我就明點解醫生係咁照小小B個腦...

亦都無咁擔心~~

但勢估唔到阿女對我咁好, 用咁既方法黎等我行返"催生"條"捷徑"... XXDDD

不過, 平安夜果朝就去私家產檢, 又睇下醫生到時點講啦~~

小小B 之 正常返啦~~

Date back to 14.12.2015 @ 35w2d

抖左一個星期, 今日返去私家醫生到產檢...

好在小小B都生性, 檢查發現胎水量正常返!! 原來休息真係有效~~

至於佢個size, 重4磅11安士, 繼續都係頭少少偏細, 肚細2W, 腿長1W...

醫生話照咁既走勢, 出世應該6磅左右~

對我黎講6磅已OK啦~ 重過小B果時都算係咁... XD

之後醫生都想我再休息多幾日...

好老實, 胎水多定少我自己唔可能感覺到... 如果休息係咁critical, 都真係唔好搏休息多D穩陣D... 所以醫生寫左4日假俾我, 我就打算休息3日... 畢竟放產假前都仲有公司野要做埋先...

又, 原來私家產檢真係好好好重要!!

今次如果唔係私家產檢, 我根本唔會知自己胎水少... 亦都係私家醫生先會寫病假紙俾你休息!

因為上星期見到情況咁, 即刻上返QE睇, QE醫生見到都只係話排期照多次超聲波, 仲要排到22/12... 真係有無遲D呀?! 更加唔使旨意佢會寫病假俾你安胎...

記得生小B時我就係諗住胎盤前置政府會同我係37W5D時照多次超聲波, 所以後期都無去私家覆診... 點知小B就重得好少我都唔知, 政府醫生真係一照到小B頭仔過左胎盤話你可以順產嘞就mission completed, 睇左唔知有無3秒就熄機收工, 都無再度下小B有幾重size岩唔岩etc....

所以, 今次私家醫生次次都叫我係指定日子返去覆診, 我都唔敢唔聽話, 有D $真係唔慳得... (但好在係政府生, 所以我同陳老公既公司coverage都仲頂到不斷去私家產檢既$$... 不過都係果句, 就算包唔哂自己要出$都真係要密密check唔慳得!)

小小B 之 突然要SL

Date back to 11.12.2015 @ 34W6D

上次去完私家產檢後, 又再上政府照超聲波, 結論都係阿女偏細(但腿長囉...-_-"), 但醫生都話size無問題, 然後就俾返個排版我叫我落返健康院覆診嘞~~

去健康院覆診日子未到, 34w2d果日先到私家醫生覆診...

阿女size都係咁上下...

肚圍依舊細2w...
頭圍跟到34w3d...
腿長34w6d...

重4磅3安士~ 繼續係中碼偏細b~

都係預期之內...

點知, 臨尾醫生話...

阿女條臍帶纏頸一圈... 醫生話只要唔作動其實都ok唔使擔心...

生阿仔時都試過臍帶纏頸一圈, 總之助產士留意住生果刻既情況就ok, 我都唔太擔心...

但跟住醫生又話...

我胎。水。少﹗

佢話我上次都有13(指數), 今次跌到6... 係擲界水平... 如果5就太少要催生嘞...

檢查過臍帶血流量又正常, 照結構時又無話阿女個腎有事...

上網search過好多孕婦胎水少係原因不明... 所以我都唔知發生咩事...

最後醫生寫左成個星期病假俾我休息~~ 希望休息多d會有改善!!

今日已經係第四日既sick leave~

除左有一日上左QE見醫生外, 呢幾日都係主力食同瞓, 飲多d湯水同埋水, 希望多返d胎水, 再唔係都谷肥d阿女, 萬一touchwood要早d出世都重磅d唔使瞓箱啦~

不過無時停既我每日都有幾個鐘活動下既... 即係做下手作煮下簡單野食咁, 都係適可而止唔會太粗勞...

諗落... 我平時一日最多都係瞓到8至9個鐘... 但其實一星期可能有一半日子係半夜醒左瞓唔返既....

但呢幾日我每日可以瞓多3個鐘!! 即係平時睡眠時間真係好唔夠~

再加上11月以來都keep住OT.... 雖然一星期都係一晚起兩晚止, 每次都係個幾兩個鐘only...

Weekend又真係用黎陪阿仔多... 總會安排d活動佢玩下...

可能阿女見我真係超級無敵既唔夠休息, 今次迫我休息下...

我都好乖咁完全無理公司野嘞... 休息完先算~~

話時話, 呢d爽歪歪可以係屋企hea既日子都唔會多... XD 真係hea得一日得一日嘞~~

希望下星期去檢查胎水量正常返啦~ (finger-cross~~)

灰灰灰灰爆的大肚相... =(

Date back to 7.12.2015 @ 34W2D

9月時已約左影大肚相既日子...

雖然唔係第一次大肚, 但係9成9係最後一次大肚(果0.1成機會我都唔想佢發生!)~

雖然第一次大肚時已咩造型都玩過仲影左十個鐘... 但一次還一次, 今次都想留個記念~

上次主要玩造型室內相多, 所以今次好想影outdoor... 有陽光好溫馨果D感覺~~

雖然只係兩個鐘既攝影時間, 但今次預備既東東都不比以前影相既少...

以前幫襯一條龍服務既, 化妝造型道具全包, 當然有D野都要自己預備下諗下, 但開聲人地就會幫你安排...

今次要自己張羅化妝, 衫, 道具, 仲要諗去邊度影... 其實都花左好多心血...

又諗住上胎自己個肚細8個月影都無咩睇頭, 今次拖到8個半月先影, 希望多D野睇下...

點知...

諗住踏入冬季基本上都唔會似得夏天咁傾盆大雨啦...

偏偏前日就係我地影相既日子, 落雨落到唔可能唔擔遮... 最重要係, 個天色係灰既... 下午2點街燈都著埋果種...

到左目的地耐心等待希望有奇蹟發生...

但當然, 最後奇蹟無發生到... =(

其實之前知道天氣預測咁, 都多次嘗試同攝影師夾時間改期...

但夾得到攝影師之餘又夾唔到陳老公, 到我地兩個都得時攝影師就唔得...

都預左星期六去到係搏一搏...

預左係一件事, 到時要接受又係另一件事... 而且點都無諗過情況差成咁... 明明見朝早起身時都仲係好天無落雨...  點解天文台今次咁準... wuwuwu... 仲之前幾日同之後幾日都係好天!!!

最後好勉強影左一陣... 但攝影師都話退返deposit俾我地...

即係都唔好expect有咩相影到... 唉~

其實攝影師好好, 話補返個newborn俾我...

但都已非我本意... 同maternity photo is totally different!!

同埋因為我家唔夠光猛，如影newborn 就要係十二朝內帶埋阿女去我99度影... 依家呢一刻真係想象唔到到時既身心狀態係咪應付到...

時間咁急都唔可能搵到另一個岩心水既攝影師有期再影... (岩岩問左個, 佢一知我due date後都唔再睬我嘞...唉...)

依家事隔兩日諗返起都係唔開心... =(

*    *    *

兩日後，喜出望外地攝影師send左一幅相俾我頂住癮先！

幅相仲要望落好光猛唔似咁暗！係我個肚望落依然細小～ XXDDD

我諗攝影師花左好多心機同時間嚟執！好多謝佢無放棄呢輯相！第日收齊相再同大家分享～

我知道都幾難再搵攝影師影大肚相嘞，甚至自己影都難... 原因下篇blog再講～～

小B給妹妹的第一份禮物

自從俾小B知道將會有個妹妹後, 感恩佢似乎都幾受落~

呢排執返D冬天衫出黎, 好多小B都唔岩著, 佢就會話留返俾妹妹...

對鞋唔岩著, 又話留返俾妹妹...

唔玩既玩具, 又話留返俾妹妹...

小B又好知道第日妹妹出左世, 有D玩具要收好D唔可以周圍放, 怕太細粒妹妹會吞左~ 可能我地由有左妹妹之後久唔久就同佢講下, 佢似乎都好有"家居安全意識"~ XD

知道佢(暫時)咁錫妹妹, 真係好窩心~

早兩日婆婆買左套新玩具收埋左, 諗住遲D先攞出黎俾小B玩~ 點知俾眼利既小B發現, 我放工返去見到佢有新玩具, 小B就話開黎係同妹妹一齊玩...

呢個仔... 妹妹未出世就搵佢過橋... -_-""""""

不過, 除左過橋同唔要既舊野要俾妹妹, 小B有時見到D裙仔都叫我地買俾妹妹著~ =]

上星期係學校畫畫時, 仲畫左一幅話係送俾妹妹既!!

佢話呢個係妹妹黎, 橙色係頭髮, 黑色係面... 但佢無畫到眼睛落去喎~~ XD

佢應該係睇完妹妹張4D相畫出黎既...

佢幅畫同張4D相一樣... 一樣咁抽象(小B契媽係完全睇唔明張4D相, 所以對有D人黎講真係好抽象架!)~ XDD

希望妹妹出世後小B都係咁錫佢就好嘞~~ ^^

小小B 之 媽媽奶有無用?

Date back to 23.11.2015 @ 32w2day

話咁快又兩個星期, 又到私家產檢既日子~~

上次私家醫生要我試下飲媽媽奶谷下阿女, 仲要我一日飲兩杯...

但我最終只能夠一日一杯... 因為真係平時食飯都食到好飽, 除左早餐時間外, 都無空間再隊多杯媽媽奶, 無理由唔食飯飲媽媽奶嘛?! 都試過夜晚臨瞓前飲, 但飲完成晚頂住個胃又搞到瞓得唔好...

至於媽媽奶味道, so far牛X牌既朱古力味幾好飲~ 美X佳兒既雲尼拿味有人話太甜, 但我都覺得ok... 但試左雅X喜X素就真係麻麻... 我唔係怕隻味, 學醫生話齋, 唔好味咪當飲苦茶囉~ 問題係我飲完個胃就一直唔舒服... 咁唔受得都無法...

暫時只試過呢3隻, 剛剛飲哂成盒牛X牌, 打算又試下其他牌子啦~~

講左咁耐, 其實, 飲完有無用呢? 定學似坊間所講肥媽唔肥B呢(呢樣真係最唔想... >.<)?

今日去私家照超聲波就一清二楚!

阿女照左出黎係...

頭圍: 32W
肚圍: 32W2
大腿: 32W6

跟。得。返!!!

好在, 媽媽奶都work!! 我呢兩個星期又飲左兩次花膠湯, 唔知又關唔關事嘞~

依家阿女重3磅14安士, 即係接近4磅~ 唔期望亦唔太想生個大碼B(根據往績都應該機會甚微), 但求健康跟足周數就好~

暫時飲左兩星期, 我又唔覺得自己有肥到啊~

不過飲媽媽奶都有後遺症... 就係便便有困難... >.< 但為左阿女, 都要繼續飲到生嘞~

今次醫生又影左阿女個4D樣~~ 佢嘟哂咀咁好好笑~ XXDDD

小小B 之 出動媽媽奶

Date back to 9.11.2015 @ 30W3D

話說上次去完健康院產檢就俾醫生話肚細要我上返去QE檢查~ 雖然其實都唔太擔心, 但梗係早D去私家檢查下好D~ 好在之前已經約左今日去私家產檢~

一入到去見醫生, 話俾醫生聽健康院醫生度完我子宮高度... 都未講完成句, 醫生已笑笑口話佢話你肚細, 叫你上返醫院覆診呢~~ 醫生真係好野, 全中~~ 可能我個肚真係細到目測唔使度都知佢細... -_-""

跟住就照下超聲波睇下阿女個size啦~

好在, 頭圍同肚圍都只係細一周, 大腿骨反而長兩周... -_-""

又係咁... 都好在唔係真係健康院醫生度出黎既細兩周...起碼仲有條腿證明佢成長得唔錯... 啦~ XD

呢個咁奇特既身型比例, 連醫生見到都覺得好搞笑~~ XD

佢話阿女係中細碼, 依家重約3磅... 應該仲有進步空間~~

跟住就叫我要飲下媽媽奶, 仲要一日兩杯!

成日睇D資料見到話懷孕既婦女唔使特別食多好多, 只係每日多片麫包, 多杯奶就得... 點知對我黎講唔WORK... -_-"

今次冒住暴肥既危機都要試下谷阿女嘞~

姑娘好好, 係咁俾試用裝我, 唔使自己買~ 約左兩個星期後再見醫生, 睇下有無進展嘞~ =P

睇完醫生打電話同陳老公講, 佢都話gens係咁, 盡下人事啦... 唯有係咁啦~ XD

小小B政府產檢@健康院

Date back to 3.11.2015, 29W3D

上次9月尾係QE第一次見醫生後, 就俾醫生安排落健康院繼續產檢~ 都係好事黎既, 根據上胎經驗, 無事無幹先會叫你去健康院, 而且健康院少人好多, 唔使等咁耐...

照計健康院既產檢無咩好記錄, 因為都係同醫院平時既產檢一樣咁原始... 去只係例行公事... 決定去政府生就無辦法, 明知無聊浪費時間都要去啦~

今次去健康院又係見返果度唯一一個醫生...

醫生又係用最原始既工具 -- 軟尺一把, 黎同我度肚... 之後聽小小B心跳, 跟住又問下我有無睇私家醫生, 私家醫生照超聲波點講... 我話佢知上次小小B個頭圍細左兩周, 不過可能係佢位置唔好拉得唔準...

點知, 健康院醫生就話我個子宮高度都比正常細左兩周... 結果要我返上去QE產檢, 仲要兩個星期內要返去!

其實我好相信小小B好健康, 因為我上胎個肚都係細... 而且小小B成日都郁, 仲要郁得好大力... 不過, 醫生話咩就咩啦, QE設備點都一定好過健康院既... 而且再下星期又去私家產檢嘞, 到時一照超聲波就知咩事~ (心諗健康院產檢真係好廢...)

咁岩我黎健康院產檢之前果晚肚痾, 咁諗住順便問下醫生啦... 佢都只係"啊, 係呀..." 咁就算... -_-" (心諗: 好廢X2)

跟住佢又循例問下我有無食補充品, 問完一輪就話如果無哂materna可以同佢地講, 佢地可以開俾我... 問佢有無得開葉酸果D (都唔敢問佢有無藻油丸啦, 十成十唔會有...), 佢話只有materna... -_-"" (心諗: 好過無啦... 但咁遲先上健康院, 都就黎生得啦, 買左未食哂亦都唔需要問你攞啦...)

見完醫生, 係姑娘度攞返個排版後(又要帶返個排版上QE...), 果時先4點左右, 健康院已經一個patient都無, 我係最後一個! 而我攞既籌係5號... 即係下午得5個patients! D姑娘同姐姐已經開始係度嘻嘻哈哈打牙較嘞~ 真心覺得... 健康院真係好hea好好做啊... 唔怪得3年前又係果D姑娘醫生, 今時今日都係啦... 

孕婦SPA @ SPA L' OCCITANE

Date back to 20.10.2015 @ 27W3D

十月既小草工作忙到癲...

兩個星期內,帶左兩個兩日一夜camp, 再加5晚OT... 基本上要返工 = 要OT咁滯...

唔係我做野做得慢要OT,而係學生活動要就學生放學後先搞得... 所以, OT係身不由己... -_-"

好在, 辛苦完一輪都有得抖下~ 有得係平日放返假休息~

陀今胎一開始已經尾龍骨痛... 情況都唔妄想會改善啦, 只會愈陀愈痛架啫...

在家我亦有自己做下舒展運動, 又晚晚搵陳老公做幾分鐘骨仔按下... 叫做好過無咁啦~

亦都有搵過孕婦瑜珈既資料... 只係, 返工都返到不見天日咁, 仲何來有時間去做瑜珈?! 仲要D地點都唔就腳... 要特別花時間放工搭車去另一區做完之後再花時間返屋企, 對依家既我實在太奢侈嘞...

於是, 就研究下D懶人方法 -- 搵人按摩舒緩下~

上網search過資料, 發現都有唔少孕媽媽去L'OCCITANE按摩~

最正係佢有孕婦專用既按摩床, 張床有個窿可以俾孕婦趴係度~ 要知道大肚之後想趴係度基本上係mission impossible!! 條腰連瞓覺都要俾個大肚紮住, 好多姿勢都唔舒服, 可想而知條腰有幾咁攰...

眼見其他做SPA既地方都無孕婦按摩床, 所以一心鎖定, 放假時一定要去試一次~

SPA L'OCCITANE有幾間分店, 但原來只有灣仔店有孕婦按摩床, 所以我呢個九龍人都迫住要過海一趟啦~

灣仔星街我都係第一次去... 好在有google map~

不過都比想象中行得遠, 仲要上左條好斜既樓梯... 去到都遲左幾個字...

間shop原來係地舖行上去~ 都好多級樓梯...

上去過埋條長走廊轉個彎就係reception嘞~

上到去就有職員俾問卷我填~ 期間仲斟左杯水俾我~~
當然...呢兩杯茶係人地既... 大肚婆佢地只俾水... >.<

氣氛好relax~

之後就由按摩師帶我入SPA房嘞~

孕婦專用按摩床~ 除左有個窿, 仲比一般按摩床長D同闊D~
換上即棄bra bra底底, 帶埋頭套後, 呢個期待以久既relaxing treatment就開始啦~

用既都係佢地既product~

可惜孕婦唔用得有香薰既按摩油~ 如果有埋淡淡既香味就仲正仲relax... (期待生完B後... kekeke...)

















一個鐘頭眨下眼就過去~ 按摩師都真係按足一個鐘啊~

成個過程按摩既力度都係比較輕柔, 亦唔可以按穴位, 畢竟孕婦按摩係有一定限制~ 雖然係咁, 但小草已經好滿足啦~

按摩師亦好細心, 扶上扶落, 臨走仲送埋我落樓下~ 埋單時亦唔會好hard sell我join package~

我係non-peak hours (i.e. Mon - Thur, 1- 6 pm) 去既, 所以有85折~ 成個過程1.5小時左右, 埋單$7XX~

返去俾D相陳老公睇, 佢都話咁既環境, 同埋咁既service, 價錢唔算貴~~

佢由12W-36W都可以按~ 已經心郁想生之前去多次~ XD

小小B 之 飲糖水 + 私家產檢

Date back to 13.10.2015

今胎QE俾埋糖水期我, 當然去啦, 又慳返係私家驗既幾百蚊~ =P

上胎係私家都飲過糖水驗妊娠糖尿, 所以都知大概流程係點, 就係空肚抽血 ->飲超甜糖水 -> 等一個鐘 -> 抽血 -> 再等多一個鐘 -> 再抽血~

上胎飲都無嘔, 只係wing wing地加好眼瞓, 同埋有抽血抽到怕既感覺... 雖然其實我一向都唔太怕抽血... 但隔一個鐘抽一次都幾難頂...

為免自己抽得血太多暈低, 今次都有叫陳老公請假陪我去~~

點知原來QE只係total 抽兩次血, 即係空肚抽一次之後, 飲糖水後兩個鐘再抽, 之後就走得!

等抽第二次血既期間我都無咩好唔舒服, 只係好眼瞓, 眨下眼抽完血走得~

陳老公反正請左假唔好嘥, 特登安排埋下午去私家產檢~

假期寶貴, 我地一向都係寧願留返D假係BB出世後用~  第一胎果時陳老公都只係陪過我去飲糖水同照結構, 今胎今次係第一次陪我去產檢呢~

私家醫生下午最早既booking都要3點, 係QE飲完糖水都只係11點幾, 可以食個long lunch!

可能之前果個星期返工太辛苦, 難得有假放又二人世界, 發起神經既我捉左陳老公去間日式餐廳, 本來諗住叫定食, 但見到人地個放題食刺身咁吸引, 入到去轉軚食放題~! 難得係陳老公又俾我咁放肆... XXDDD

不過我都好"乖"地先叫左一堆熟食黎填飽自己先, 之後先食少少生野... 同食一人一杯配給既哈根大師雪糕~ 哈~

依家呢一刻寫返都仲好回味呢餐~ =P 果日我地飽到食唔落晚飯呢.... XD

講返個私家產檢先...

我地2:55已去到, 我係下午既第一個~ 3點過D就有得睇~

話說上次QE照結構照唔到阿女隻耳仔, 同私家醫生講, 佢就即刻話一陣同我睇下~

因為朝早去QE飲糖水, 我咁岩帶埋政府個排版係身, 多口問下醫生想唔想睇下, 佢二話不說就叫我俾佢睇, 話睇下有無野岩使... 而且仲唔係睇兩眼就俾返我, 而係KEEP起我個file研究左一輪, 最後俾$時先叫姑娘俾返我~ 佢既認真態度真係十個讚!!

之後就照阿女嘞~~ 一開機醫生就同我睇哂兩隻耳仔~ 之後就照下其他部位咁...

但阿女今次又係姿勢衰衰咁... -_-" 好難照...

照左一陣, 醫生竟然叫我地出去坐下話轉頭再照過~ 其實如果佢當時話已經睇完叫我走我都OK... 因為覺得要照既都照左...

等到5點左右, 又再入過去...

原來醫生好努力想照阿女個樣俾我地睇!

又, 原來醫生部機可以轉做4D!!!!! 我一直都唔知佢可以照4D亦無打算特登出去搵4D照!!! 真係喜出望外~!

可能佢見陳老公一場黎到啦~~~ XD

眼見阿女都係遮遮掩掩咁... 但總算無失醫生手神... 勉強都影到幾張... 呢張係最四正架嘞~

但其實我覺得個個B個4D樣應該都係差不多?! XXDDD

醫生照到佢個樣先肯收手~ XXDD

臨尾我問醫生, 佢咁既姿勢係唔係唔正常? (因為上次照結構俾助產士講到D姿勢好差咁...) 點知醫生話, 其實個個B都係咁, 佢咁樣係好正常既... 啊, 即刻放心哂~

今次阿女...
頭圍: 比周數少兩周, 不過醫生話佢個姿勢問題, 頭圍拉得唔太準, 而且少兩周都係可接受程度, 唔使擔心~
肚圍: 今次竟然又跟足周數啊~
腿長: 比周數大一周~

至於我自己, 懷孕到依家26W3D, 重左12磅左右~ 肚圍約34"~ 點睇都唔似有6個半月肚... 醫生都話我肚細~

我自己就都係果句, 阿B發育OK就得啦~ 要繼續肥B唔肥媽!!!

初次網購@ZALORA

做左阿媽之後, 行街shopping既時間少左, 但買既野都係咁多!! 事關現今科技發達, 真係安坐家中/Office, 隨時隨地都可以shopping!

以前通常淘寶多, 最多就係買家品~ 衫褲鞋襪反而少買, 因為怕質量唔好, 最多都只係幫襯朋友介紹既舖頭, 但要睇岩都唔容易~ 而隨住人仔愈來愈貴, 依家淘寶亦無以前咁抵~

上年開始轉戰G-Market~ 都試過買幾次, 不過G-Market唔算user-friendly, 特別對於我呢D唔識韓文既人, 每次買野都要開個google translate, 估下估下咁, 都幾煩...

我份人又鍾意諗幾日先買... 但G-Market個bookmark每次log out之後就無左, 又要重新睇過! (唔知係唔係我唔識用啦...)

而且, 最大問題係, 唔岩無得退! 件貨有問題, 淘寶都仲有得同賣家追下~ 但G-Market真係雞同鴨講, 運費亦唔平, 件貨有問題無辦法之下都要硬食~ 唔岩size更加無得換~ 小草就試過將買大左既鞋送俾好友, 又試過將唔岩SIZE既legging俾左阿媽~ 仲有一件size錯左既衫唔知放係屋企做咩...

當然, G-Market都會買到好野既~ 小草就曾經買過兩件自己幾鍾意既大褸~~ 不過, 真係要睇彩數同有風險~ 同埋實左要花好多時間精神先買到心頭好~

早排睇到Tareworker既blog post, 先知道原來ZALORA除左有鞋賣之外, 仲有衫褲賣, 而且仲有韓風衣物賣~ 上左ZALORA網站八下八下又正諗住入手之際... ZALORA PR竟邀請小草試用佢地既網上購物服務! 小草當然卻之不恭啦~ ^^

其實幾年前都見到ZALORA呢個網站賣鞋~ 不過小草對腳一向"好麻煩", 好易刮腳而有D鞋款我亦著唔到, SIZE又要視乎鞋款, 有時著37, 有時著38, 所以都甚少上網買鞋(尤其是之前小試牛刀係G-Market買完但唔岩要搵人要...)~ 但原來ZALORA有得30日內免費退貨! 咁即係買完返黎真係唔岩SIZE都有得換啦~

自從做左阿媽都係著flat shoes多... 好在flats都有超多選擇~

呢D動物公仔鞋好可愛啊!!

可以ZOOM近睇details~

仲有清楚既尺碼指南, 唔使估估下...

俾$方式可以揀credit card, paypal或貨到付款~ 送貨就用順X果幾間大既速遞公司~買滿$150就可以免費送貨~ 運費唔使計住點樣買先抵~ 爽!!

我俾左個順豐站自取既地址佢... 咁... 唔使寄上公司俾同事知我又shopping嘛~ XXDDD

期待幾日後收貨!! ^^

***************************************************************

話咁快就收到貨！

打開鞋盒後，陳老公一睇就話對鞋靚！

再話埋俾佢聽對鞋只係$149 only, 佢即刻覺得抵到不得了！

對鞋質料好好, 真係無諗過只係百幾蚊~~~

試上腳都唔覺得刮腳, 只係... 緊左少少...

都話小草對腳好麻煩, 呢對係7號, 如果有7號半就應該最fit... 但又因鞋款而異... 所以都有諗過換大一個碼...

好在如果要換都好簡單~ 填好包裹裡面張表, 連埋件貨同包裝, 入返落包裹個袋, 原裝寄到付就得~

不過, 陳老公話怕我換大一個碼會太大, 我又攞屋企同類型既鞋出黎比對下, 的確, 鞋底既size係一樣, 如果換大左就真係太鬆嘞...

再加上... 其實我大住肚, 果晚對腳都脹脹地... >.<

估計著多幾次對鞋就應該good fit~~ 最後都係決定唔換嘞...

同場加映... 其實我仲買左件衫... 

質地幾好而且都岩身~ 當然, 同model著既效果圖梗係差好遠... 因為我多左個大肚... XD 所以唔著俾大家睇嘞~

總括黎講, 今次網購經驗好滿意!

睇怕會陸續有黎...... (其實我今次仲買左兩件韓風衣物正on the way...) =P

小小B照結構@QE

Date back to 18.9.2015 @22W6D

今次應該係因為高齡既關係, QE有期俾我照結構, 雖然無相留念, 但慳返幾千~ =)

當日幫我照結構既係助產士, 等緊時眼見成個診所都係助產士, 一個醫生都無... 所以都唔望會無啦啦走個醫生出黎~ 況且, 其實我覺得有時助產士仲熟手過醫生... =P

不過都暗自祈禱希望阿助產士照得詳細D, 唔好HEA我...

點知...

HEA我既唔係助產士, 係阿女... -_-""

助產士開機一照, 就話阿女有無搞錯, "摺埋個頭"咁既姿勢點照呀?!

"摺埋個頭"<-- 呢個term, 好老實, 有D得人驚... 好在聽清楚就知佢講緊係姿勢問題... 睇個mon就見到阿女個頭塞左係我肚既右下角, 仲攞個唔知頭頂定後腦"得"住我地... 總之就睇唔到個樣...

跟住助產士就唯有照左D心肝脾肺腎先啦...

唔知係唔係真係咁難照(你知, 果D超聲波得佢地先睇得明...), 照照下阿助產士又話阿女咁既姿勢點照呀, 依家照到D次序亂哂, 本來係順序由頭照起架嘛... blablabla....

咁我問佢, 如果依家照唔到咁點呀? 佢竟然答我... 唔知點呀, 你又係最後一個... -_-"

照D手手腳腳又照到一忽忽... 即係正常(陀阿仔經驗啦..)係照完左手照右手咁架嘛, 但助產士搵到阿女一隻手又搵唔到另一隻... 因為阿女將隻手屈埋左去後面... -_-"

再嘗試照佢塊面, 阿女又將個頭埋左去個胎盤度, 總之就係睇唔到佢個樣! 

跟住又俾阿助產士哦左兩句...

其實又唔可以話助產士態度差, 係講野無咩尾音, 同有D牢騷囉...

我最怕佢求其照, 所以佢哦我都無上心, 政府既人既態度係咁上下... 而且我果時都22W6D, 如果佢今次照唔清楚, 我再BOOK出面照都唔容易...

好在佢都好盡力要照到為止, 照到咁上下, 佢就熄機叫我郁下先, 佢去寫我份報告, 之後再照過...

老實, 我都唔知點郁先可以令阿女合作...

郁左一陣, 助產士叫我要大動作D... 我心諗, 唔係要我倒立先得呀?! XD

搞完一輪, 再照...

終於見到阿女塊面... 半邊咁大把...

先係見到佢個面反轉向住個mon... 即係咀係上面, 跟住係鼻... 眼又俾佢攞手遮住左... 想點呀你?!

不過見佢下爬尖尖面型好似小B~ ^^ 個咀又好似小B咁... 唔通生出黎都係女仔版小B咁?! ^^

之後助產士搖佢一輪, 終於見到對眼... 但仍然係有隻手遮住少少面...

最後樣樣都照哂, 係差緊一隻耳仔無照到, 因為佢遮住左...

果時已經搞左50分鐘, 見阿女樣樣PASS無問題, 隻耳仔... 留返去私家再睇啦~ 

記得阿女照OSCAR時, 私家醫生一照就照到... 當年阿仔無論OSCAR定私家照結構都係一TAKE過, 無諗過BB係肚裡面原來可以擺D咁難度高既姿勢, 例如摺埋個頭, 自己個身扎住隻手等... 真係估佢唔到... 阿女你唔係諗住政府唔使$$就玩佢耐D呀?! -_-"

感覺上阿女可能比阿仔佻皮, 佢依家既胎動次數都好似比當年既阿仔密同大力... 可能係粗魯妹一名啊~ XD

至於SIZE方面, 22W6D重0.507KG左右~
頭圍: 跟到周數
大腿骨: 23W幾, 比佢既周數長
肚圍: 助產士第一次拉個肚圍度既時候, 只有21W, 之後助產士再好小心拉多次, 都係勉強22W... 一般見到肚圍細都會怕個B唔吸收, 但阿仔當年都係咁, 腿長腰幼, 應該係gens既問題~ XXDDD 所以都唔擔心~

BTW, 阿仔依家買褲既困難十足陳老公, 永遠係褲夠長但腰太闊, 買完D褲返黎都要係條腰度加工先著得, EVEN本身條褲已經係橡筋頭!! 眼見佢今年夏天仲著得到歲半時既褲而一D都唔緊, 只係條褲由7分變左做短過膝頭... 真心覺得條褲好抵... XXDDD 將來阿女可能都有呢個問題, 不過女仔好D, 仲可以著裙, 由長裙變迷你裙, 仲抵~ 哈哈哈...

小小B 之 痕到癲...

Date back @ 10.9.2015 - 21w4d

人地話胎胎唔同, 果然係真...

上胎成個孕期都口寡寡咁, 但今胎係14W後就味覺正常返!

個人習慣左都唔算太攰... (可能係要湊埋阿仔迫住精神...)

但有另一個問題...

就係個肚皮起粒粒兼超痕!

背脊又痕... 痕到半夜醒果種!! 而且由有左到依家都成日要半夜起身去廁所, 所以都瞓得唔好... >.<

於是又學上胎咁, 搽完油再搽cream~ 但上胎work既野唔代表今胎work... -_-"

上胎肚皮起粒粒應該係太乾, 當時正值冬季... 所以夠滋潤的話, 粒粒都退哂, 9個月都肚皮滑淨無粒無紋...

但今胎... 我諗我中左妊娠濕疹... >.<

妊娠濕疹其中一個癥狀就係愈潤愈痕... 所以搽極油都唔得...

但我亦唔敢唔搽油... 因為真係忍唔住R...好驚今胎個肚會爆紋!! >.<

諗住黎梗試下用芫栖水抹下... 希望好D啦~

今胎仲要腰骨痛... 用埋托腹帶都仲係痛... 只係好過唔用咁解~~ 

個肚繼續係比上一胎大... 不過, 大極都係俾人話肚細...

就好似下圖, 滿左20W影既...























咁著完全唔見左個肚~ XD

除非我著緊身衫兼件衫包到落hip位... 否則, 小肚子都係若隱若現only...

我都係著返平時著開既衫, 唔會為左令人知道自己大肚而特登買過D衫嘞~~ 依家呢個世代, 就算現哂肚都未必會有人理你/讓座啦... -_-"

都係果句, 肚大肚細都好, 最緊要BB健康~

自從30.7私家產檢完, 就要到18.9先再去QE照結構嘞~ 雖然成個半月都無照, 但因為已經好清晰感受到胎動, 所以都唔太擔心呀~

希望結構都順利過關!! ^^

小小B係弟弟定妹妹?

Date back to 29.8.2015

未揭盅前, 先講講"媽媽的直覺"~

話說陀小B時有打沙包既衝動, 最後真係男仔, 今次呢??

但今次唔係媽媽的直覺咁簡單, 我直情係覺得有D詭異......

發夢

係驗到棒棒出現雙線而又未去第一次產檢時, 有晚我發夢自己係屋企走廊準備開門入屋, 有個細路女跑住咁衝埋黎我度! 我手上拎住張被(係喎, 無啦啦有張被係手, 唔好問點解, 發夢嘛!!), 我攤開左張被, 個細路女就好似D西班牙鬥牛咁, 係張被度係咁鑽...

就係呢個時候, 我抬起頭, 又有另一個一樣既細路女踩住單車衝埋黎!! 我唔理咁多嘞, 拿拿聲走入屋, 跑過黎既細路女跟左入黎, 後來踩單車既俾我拒諸門外...

個細路女仲入屋自己除鞋除襪, 當正自己屋企咁...我見到小B入左屋坐係度, 我仲要提佢快D除鞋...

呢個時候就扎醒左! @@

小B既奇怪說話

第二朝起身, 趕住返工返學, 都未有時間同陳老公分享呢個奇怪既夢...

就係準備出門口著鞋之時, 小B突然望住我個肚講: 「得一個咋~」@0@

跟住仲話: 「係俄羅斯妹妹黎架...」@O@""""

 我地雪櫃一向有個俄羅斯公仔磁石貼, 我地一直叫果個磁石貼做俄羅斯妹妹...當時聽到小B咁講, 都唔知點應佢好... 因為真係俾佢嚇一嚇! 而果時我地仲未同佢講有小小B架~~~ 再問佢點解咁講, 佢又唔答我...

夢境再加埋第二朝小B既說話, 係唔係好詭異呢....??

所以6W第一次產檢, 除左緊張有無閃閃外, 就係make sure只得一個B!

睇中醫

之後9W去睇中醫, 中醫一把脈就話大機會係女~

好多人聽到中醫會把到性別都覺得好神奇, 但其實陀小B時, 當時個中醫都一把就把到係仔...

中醫話係男左女右, 如果係男仔, 左手脈象會較強云云...

當然, 把脈都唔係100%準~ 中醫都話8, 9成準架咋~

跟住12W去私家醫生做OSCAR同T21, 醫生睇超聲波話大機會係女...

好嘞, 其實小小B係仔定女呢???

小草自己當然想係女啦, 有仔有女湊成個「好」字就正啦~ 不過就算係仔都無所謂, 一樣開心架~ 兩兄弟又有佢地既玩法~

雖則之前種種都話小小B應該係女, 但其實我亦有心理準備佢係仔, 因為真係話唔埋... 發夢既內容可能係自己既主觀願望JEI...

終於, 做完T21幾日, 等到護士打黎, 小小B基因無問題, 而且confirm左, 係妹妹黎既!! ^0^

YEAH, 終於可以盡情咁睇B女衫啦~~~

睇還睇, 依家20w仲可以忍住唔入手... 只係因為... 季節未岩... =P

唔知忍得幾耐呢?! XD

小B的反應
 
小B知道係妹妹, 反應又點呢?

原來小B知道自己快做哥哥後, 就係學校同同學仔講... 老師聽到, 知道左... (唔怪得早兩個月送小B返學, 覺得班主任有意無意望下我個肚啦... 不過都估到係阿仔講出黎... XD)

有日老師問阿仔, 佢想要弟弟定妹妹...

小B好快就答: 「妹妹!」

老師再問佢: 「如果係弟弟, 你俾左個弟弟我好唔好呀?」

小B竟然答: 「好!」-_-"""

真係好在係女jei... -_-"""""

小小B 之 中孕期開始

Date Back to 5.8.2015

眨下眼已滿16W~

大部分媽媽照計係第一胎好擔心, 第二胎無咁擔心, 因為已經經歷過一次... 但小草偏偏相反, 第一胎反而大安旨意, 流啡6星期都唔太擔心, 今胎卻莫名奇妙緊張起來, 因為經歷過先知道, 一個BB的誕生真係唔簡單, 上胎唔驚真係順粹因為無知... XD

所以由上次做完T21仲要等成個月先去產檢, 時間過得真係好漫長... 尤其是又未肯定feel到胎動, 個肚大大下又好似停左唔係好大咁...

終於等到30/7做左產檢, 一切正常!

但下次要等到9月中去政府照結構先再見到小小B啦... 足足個半月!!

不過, 真心覺得今次選擇的私家醫生唔錯, 佢唔會不斷叫你去產檢略水, 真係有需要先叫你做~ 例如佢知我政府有結構期, 就叫我照完結構4星期之後先再返去睇~ 我擺明係會係政府生B, 佢亦唔會白眼我或hea我~ 而且產檢都好細心, 岩岩呢次產檢, 就好似同我做早期結構咁, 睇到小小B既器官都會盡量睇, 會話我知呢個係腎, 橫隔膜etc, 又話睇咀唇應該無問題~ 同埋胎盤都唔會學似上胎咁過低~ 見我話感覺下面好"聚"有D擔心, 佢又會同我照低少少睇埋宮頸情況, 令我疑慮盡消~ 可能suppose每個醫生都應該咁檢查, 但我鍾意佢主動話我知佢睇左D咩, 因為我無專業知識真係連問問題都唔識問~ 記得上胎果個醫生次次睇佢只係話一切正常, 當然, 正常已經好夠, 但有時覺得知多D無壞呀!!

雖然有人會覺得睇一次要9XX至1000蚊好貴, 但搵到個細心又夾自己的醫生真係好緊要, 呢D$俾得值既!! 而最正係, 每次產檢都唔需要等太耐!! 我約10:15, 通常最遲12點搞掂走得~ 上次照OSCAR同T21, 仲要係約11:15, 都係12:00前走得!!

至於身體狀況, 都係咁上下, 就係攰, 好攰, 同非常攰... 打到呢到又忍唔住打個喊路...

上星期已經開始有若隱若現既胎動, 雖然唔肯定, 但我當佢係啦~~ XD

今胎雖然早見肚, 但原來又唔係人人睇得出... 至少搭巴士企全程都無人讓座, 久唔久見一次既朋友亦睇唔出有異樣~ 反而岩岩星期日又俾生過B既教會姊妹發現... 可能見得多D既人先睇到分別~ 所以... 斷估今胎都係小肚子黎掛?!

下篇會揭開仔女之謎~ 哈哈~

小小B 之 早孕期完成 + T21

Date back to 20.7.2015

不知不覺就14W過去~ 早孕期完成, 正式踏入中孕期 - 成個孕期最舒服的honeymoon period是也~

依家反胃感都仲有, 但明顯少左~

人仍然係成日攰, 但已經習慣左, 返工食lunch都盡量爭取時間午睡, 如果放假, 午睡時間一定走唔甩~

胃口方面, 反而無早孕期時咁大食~ 雖然都比之前食多左, 但未至於一餓就要即刻有野到肚如果唔係就反胃同胃痛咁誇張...

肚都未算好大, 但比第一胎時大好多...
早兩日已經俾教會既"有經驗人士"一睇睇出... 如果係上一胎, 咁既size應該係5個月肚囉...>.<

12w3d果時仲去左做Oscar同T21~ 因為已屆高齡, 做左安心D, 雖則費用大拿拿8K... 好在小草公司+陳老公公司都有coverage~ 但就算無我都會做...

Oscar好多人都知, 但咩係T21?

敏兒安T21是一種用於篩查胎兒染色體非整倍性, 如唐氏綜合症、18-三體綜合症及13-三體綜合症,的非侵入性產前DNA檢測方法。該診斷技術由香港中文大學研發。中大在這技術有多項專利權或已作專利申請。孕婦懷孕期間，其胎兒釋放DNA於母體血循環中。敏兒安T21檢測法分析胎兒DNA，並探測母體血漿中21號、18號、13號及其他染色體的DNA 分子數量。

(Source from: https://www.fetalmedicine.hk/tr/safeT21.asp)

結果係小小B一切正常~ ^^ 仲confirm埋性別tim~

但容我賣個關子, 照埋結構先公佈啦~ (如果係我FB friend既blogger友們應該已經知啦... =P) 唔係話T21唔準, 只係, 陀過B既都知, 依家只係第一關, 仲有結構果關要過啊~ 陀B真係唔簡單~

小B做哥哥~

Date back to 30.6.2015

小小B都快3個月了, 見情況穩定, 係時候同小B講呢個消息嘞~

當我地同佢講媽媽肚裡有個BB, 小B就快做哥哥時, 佢既樣先係驚訝, 繼而露出難以置信既表情... 好好笑, 可惜無錄低!!! >.<

之後佢就開始話唔想要一個BB... ?! 我地再問佢, 咁你想要幾多個BB呀? 小B就答: 「我想要好多好多個BB, 因為我有好多好多玩具嘛~」啊... 嚇得我呀~ XD

第二日去到婆婆家, 小B又捉住陳老公咪咪笑細細聲講:「話俾婆婆聽有個BB呀~~」好似講秘密咁, 好好笑... 當然, 婆婆一早就知小小B既存在啦~

之後去到麻麻家, 佢又興奮咁拍哂手掌話: 「麻麻, 媽媽有個BB呀~~」XD 佢真係一個守唔到秘密既小孩~ 當然, 其實麻麻都一早就知... XXDDD

好在, 小B要爆響口都只限家人... 如果周街同人講, 媽媽真係超尷尬... =P

又, 其實係未有小小B前, 小B已對"BB"有D概念~

例如, 佢有日見我地既結婚相無佢份, 就會問點解無佢份? 我地都會解釋佢聽佢果時未出世~
我地又會久不久俾佢BB時既相, 影片佢睇返... 等佢知道自己細個係點既~ 甚至會同佢講返佢出世時既經過, 例如佢自己鑽個頭落黎整個窿出黎(我果時真係feel到佢個頭鑽穿左羊水!)...

於是, 依家小B都會久不久問下我, BB出世未呀? BB整左個窿出黎未呀? 咁.... 又同我講BB出世後婆婆要洗奶樽俾BB用... 應該係聽埋唔少我地既對話多...

當然, 小B有時對於小小B既出現都好似莫名其妙有D不知所措 / 失落感? 問佢又講唔出, 只係媽媽直覺feel到小B既一絲絲不安~ 雖然似乎小B都接受到屋企會多個BB, 但到BB真係出現係佢面前時, 佢又會唔會呷醋呢? 我都係預佢呷醋多... 唔呷先唔正常~ Anyway, 到時見步行步啦~~

小小B is coming!

無錯, 呢個係報喜post!! =)

Date back to 25.6.2015

在小草的人生計劃裡一直是想生兩個小朋友的, 陳老公倒沒有所謂, 生多個又OK唔生都OK...

小B都3歲了, 假設一切順利, 小小B出世時都跟哥哥相差3年多... 所以都打算今年內積極些...

但小草由農曆新年過後就常常不明原因的皮膚敏感, 加上7月要出trip, 都打算調理好身體再算~

點知就係一次... 中左!!! 懶懶閒的我, 連葉酸都未開始食~~~

起初未知有左但又覺得自己肚腩大左腰粗左, 仲要突然勤力做運動, 又跳又做掌上壓... 汗"""

現在都未過3個月, 但好明顯陀第一胎同第二胎係有分別的...

初孕期時...

1st: 準備懷孕已經開始食葉酸
2nd: 諗住無咁易中咩都唔理到5w發現有左先開始食... 希望小小B唔會因此而蠢D... >.<

1st: 未發現有左已經常有飽滯感+頭暈標冷汗, 即刻睇中醫食中藥舒緩孕期不適, 所以食住中藥都無咩不適, 只係偶然反下胃
2nd: 發現有左都好似無咩好唔舒服, 都仲有胃口... 只係, 愈來愈唔對路, 作嘔作悶程度係可以十分鐘作嘔幾次... 幸好都未真係嘔過, 希望捱到12周不適感離我而去~

1st: 可能睇住中醫既緣故, 腸胃都無咩不適, 只係唔太有胃口食野
2nd: 胃口變得好大, 經常肚餓, 唯有小食多餐~ 同時好快已經便便有困難... 10W開始多食水果麥皮, 點知又變左肚痾... 想點?! 見自己腸胃咁差都去睇下中醫啦~ 可惜之前個中醫搬左入屯門, 睇左另一個但食完藥情況都係差不多, 只好靠自己啦... >.<另外就係8w已經開始腰骨痛... how come第二胎所有徵狀都提早了?!

1st: 陀小B時4個月都唔太見肚, 5個月時同親戚食飯都仲被人"鼓勵"我地勤力造人... XD
2nd: 7w已經覺得條褲好緊, 9w開始著大肚褲... 雖然其實都唔算見肚, 但已試過一次搭巴士被人讓座~ @@ 小草媽話"咁快見肚"係因為我本身個肚已經有肥膏... 呢個唔使講我都知既... -_-""

1st: 陀小B時由6w流啡到12w...
2nd: Touchwood 暫時只係係7w 定 8w左右見過一次少少少少血絲, 之後已經同陳老公request 我要休息多D, 一星期至少2,3日由佢帶小B返學, 等我朝早瞓晏D!! 希望一直穩穩陣陣!!

1st: 勁想親自同親朋好友同事等公佈喜訊, 極唔鍾意人地將我有喜既事周圍傳開去!! 亦對人地講既野好上心... 例如有未生過既同事恭祝我個B快D出世, 令我好唔高興!
2nd: 心態係180度轉變, 覺得無咩所謂啦, 有左都係好平常既事... 況且自從發現小小B後, 通知老細, 7月個trip已第一時間找同事代替... 即是我有左已經係公開既秘密~ 都有未生過既同事叫我食野健康D, 我都係一笑置之, 心諗, 你第日陀B你就知~ 哈哈!!

@25.6.2015
依家10w5d, 做過2次產檢~
6w多D第一次, 見到心跳~
9w4d見到小小B都跟足周數~
Keep it up 小小B!!! =)

手作 - 小B之3歲生日

依家先記錄返小B 5月既生日...

今年懶媽媽同兩個小B同學既家長夾埋一齊為5月之星搞生日會~ 所以懶媽媽無整蛋糕嘞, 改為整手作仔~

陳老公都要出動幫手, 做左唔知幾多晚, 終於做好啦~~

以下係做俾其他小朋友既襟章~ 

生日會既裝飾~ 

影相靚靚, 影完又可以俾小朋友玩~

有唔同款既公仔棒棒, 同絲帶棒棒...

絲帶棒棒做左唔係好多枝咋, 估唔到最受小朋友歡迎, 早知整多D啦~~ 





















呢D係生日會過後剩返既東東, 原本既數量係多幾倍...

風車幾乎係全由陳老公操刀... 確保隻隻都轉得郁! 做左十幾隻架~

壽星仔女既生日襟章~ 仲有cake topper!

壽星仔女既生日帽做左3隻~ 呢隻係小B既~

後面係banner款既cake topper~

我地買左個天使蛋糕, 請小朋友加M&M上去, 小朋友都好鍾意呢個環節呢! 最後再加埋Banner cake topper同動物cake topper~ 出黎效果都唔錯呀~~ ^^

睇下小B吹蠟燭個樣勁誇張~~ XXDDD

因為我地幾個家長好遲先決定幫小朋友搞生日會, 所以時間緊迫, 好似一個星期多D既時間, 要整咁多東東真係有D吃力~ 不過整完出黎又好有滿足感!

亦感恩有其他家長一齊搞生日會, 佢地都做左好多野!! 而我又可以只揀自己最喜歡既東東黎做~~ 真係全靠佢地張羅咋~ =)

Blog Blog BB Gathering @ 上水Playhouse

多謝Playhouse邀請, 又到一年一度的blog blog BB gathering啦~

今次去既係上水Playhouse!

電話：+852 2151 9881 / 2967 5633

傳真：+852 2151 9937 / 2967 5711

網頁：www.playhouse.com.hk

地址：香港新界上水龍琛路48號上水匯七樓701號舖

雖然我地係九龍人, 但上水Playhouse位於鐵路隔離既商埸, 我地過去都算方便呀!!

上水Playhouse最signature既要算係呢個大型滑梯!!

小B學校觀課日

Date back to 21.4.2015

本來不打算寫, 但觀課時又不准拍照, 沒有相片post到FB相簿做record, 如不寫blog應該好快會忘記... 所以即使已過了一整月, 趁著還有記憶就要寫下啦~~

小B學校觀課時間只有45分鐘, 流程是先由校長講解, 觀課, 之後家長有疑問可提出~

觀課前, 小草已告訴小B多次媽媽要來看他上課, 之後媽媽就走, 他繼續上課, 放學婆婆來接~

當天校長簡單解釋完老師今天講課內容, 及家長的注意事項, 例如不要讓小朋友埋身, 如他們轉過頭來, 我們就做動作叫他留心聽書等等... 之後我們便進入課室了~

一班約30個同學, 分做兩小班~ 在同一個班房裡, 一半做蒙特梭利工作, 另一半由老師授課~

入到課室, 小B見到我叫了一聲媽媽, 之後全程都很留心聽老師講書, 沒有再轉過來! 大部分小朋友都很專心呀, 只有一兩個小朋友偶然忍不住~ =P

今天教的課本是遊公園, 上的是數學堂, 學"3"字~

老師預備了一隻大蝴蝶, 但用卡紙遮著, 剩下一小孔, 再問小朋友這是什麼~ 老師未講完, 小B已答"蝴蝶", 相信老師之前已教過一次... =P

老師又預備了蝴蝶的短片, 又叫小朋友出去圈出蝴蝶~ 小B次次都很踴躍舉手!

之後, 老師預備了花兒與蝴蝶頭飾, 由3名小朋友扮蝴蝶, 一邊唱關於蝴蝶的兒歌, 一邊飛到扮花兒的小朋友身旁~ 每個小朋友也有機會扮蝴蝶呢!  

最初小B被安排扮花, 他戴上頭飾後就站了起來行出去... 但其實花兒要坐在原位, 只有蝴蝶才出去呢... 他立時被老師問: 「小B你去邊呀?!」他這才呆豬豬的坐下來... 令在場的家長爆笑~ XD

最後一轉終於到小B扮蝴蝶~ 他扮完之後眼定定望著老師, 好明顯是要老師讚啦~ 老師都留意到, 立即讚他做得好~ XD

觀課就這樣結束了~

走時大部分小朋友都沒有喊~ 好叻~

眼見小B望著幾個小朋友喊, 露出不明所以的樣子... =P

早說在課室同時有十多位小朋友在做工作~ 他們都很專心, 絲毫沒有被音樂, 影片, 以及一大群家長distract! 校長說他們都習慣了這樣的上課模式~ 好叻!!

第二天小B的老師告訴我, 小B昨天整天都很high, 心情十分好~ 老師問他是不是因為媽媽來觀課, 他答是啊~! 媽媽聽到都好冧... 哈哈~~

小B第三次出遊 @ 新加坡 (Day 2) Part 3 + (Day 3) Part 1 - Legoland Resort

去完Legoland, 晚餐就在附近Food court解決~

叫了個海南雞套餐, 有飯有粉有菜...

菜就是這個芽菜...

 都忘了這是什麼菜式... XD

馬拉style, don't expect too much~ 質素ok啦~ 

換床記

寫寫下遊記要插隊... 小草覺得這對小B和我都是一個里程碑, 要好好記下來~

因為繼上次買被記後, 終於都換床了...

其實應該打鐵趁熱, 床品等等齊全便應要小B換床, 趁他熱情未冷卻, 新鮮感尤在的時候...

當然, 講得出呢句就是因為我們沒有打鐵趁熱! 眼見小B雖然很喜歡新床, 但要他過去睡就耍手擰頭, 即使是一個午覺都不肯...

又看過一些文章, 知道如強迫幼兒太小就與父母分開睡覺, 是有可能帶來長遠的不良影響, 例如缺乏安全感等等... 而每個幼兒的時間表都不同... 所以都不想夾硬來~ 順其自然算了~

再者, 小B的attachment應不是床的問題, 而是"我"這個陪瞓專員, 每每半夜三更扎醒要拖著我的手才繼續入睡... 即是, 最緊要是睡在我旁, 睡哪兒可能都是其次~ 小草心想反正7月都要出trip一星期, 到時小B無辦法之下自然會"搣甩"這個習慣...

怎料都不用等到7月...

本來他的高度早已超越BB床, 如果他要伸直雙腳, 基本上要伸出BB床外才可以, 不過他一直都喜歡用腳撐著兩邊的床欄睡, 所以BB床還勉強睡得下... 但5月初開始, 他便有"迫爆床"的情況, 無論他碌去左碌去右都會撞著床欄, 頂頭頂腳更加是不在講... 半夜會因睡得不好哭著醒來, 要到我們的大床睡... 我們除了要忍受他的旋風腿外, 他自己其實也不見得舒適...

昨晚終於說服他嘗試睡在新床~ 為此, 事前做了不少準備功夫, 如:

1. 跟小B的班主任溝通過, 讓她跟小B談一談... 要知道老師講一句, 好過我們講十句~
2. 放置他喜愛的公仔玩伴在新床上~
3. 告訴他如半夜醒來可以找我們, 更跟他熄燈練習幾次"半夜醒來找爸媽"的路線~

結果是, 昨晚第一晚實驗, 原以為他到半夜就會醒來找我們, 怎料他竟一覺睡天光... 倒是我這個做媽的, 半夜醒來放心不下多次到隔離房看他... =P 見他睡得香甜到有兩次下半身掛在床緣... 似乎放不下的其實是自己...

小B又長大了~ 大手拖小手一起睡的日子會變得愈來愈少... 著實有點不捨呢~~

*         *         *
實驗第二晚~

半夜三更叫媽媽~ 帶他過來大床跟我們一起睡, 但他睡不著(竟然?!), 碌來碌去幾個字後, 告訴我要回新床睡!! (YEAH!!!) 陪他在新床睡了一會, 小草再回去自己的床~

小草被連續折騰幾晚, 好眼瞓......

*         *         *
第三晚~

半夜醒過兩次... 我指的是自己... -_-"

一次是小B叫媽媽, 我過去看, 原來是他發開口夢...

另一次是他喊著叫媽媽, 原來是跌了在地上, 幸好有枕頭墊著... 抱起他不到30秒他又再睡...

幾晚以來, 小草這晚算是睡得最好的了...

至於陳老公... 爸爸就是比媽媽多了一個"系統", 就是"自動隔音系統"... 小草晚上多次醒來陳老公都是毫無知覺... 他朝朝見到小草的嚴重渴睡樣都只能說句"呢幾晚辛苦你啦..."

其實, 我真係唔明, 點解咁都可以唔醒... -_-""

小B第三次出遊 @ 新加坡 (Day 2) Part 2 - Legoland

Legoland 與 Legoland 酒店只是幾分鐘路程~

先玩揸船~ 要著救生衣, 好認真~

小B第三次出遊 @ 新加坡 (Day 2) Part 1 - Legoland Resort

終於整理好相機的相片, 發現原來Day 1外出前也拍了酒店露台的風景...

雖然今次沒有到Sands 和 Singapore Flyer一遊,  但原來遠看夜景很不錯啊!

日頭是這樣的... 另一道風景~

從45樓望下去, 很爽耶... (但小草腳軟ing...)

到樓下Raffle City吃了早餐後, 便開始向馬來西亞的Legoland出發!

萬萬想不到旅程是這麼漫長...

小B第三次出遊 @ 新加坡 (Day 1)

繼小B台中遊後, 今次是小B第三次坐飛機了~

第二次呢? 是去年5月的台北之旅, 趁著小B未夠兩歲還可買BB機票... 對於那個trip, 小草只記得台北幾天都是瘋狂下雨, 是香港的黑雨程度, 不能用BB車只好每天孭著小B周圍去... 都沒有心情拍很多照片啊~ 只記得到了台北動物園, 還有嶕溪浸溫泉... 行程不多但累爆的trip!

第三次趁小B未滿3歲, 很多酒店也free of charge的時候, 再飛! 經過兩次實驗, 小B坐飛機時都很乖很定, 於是今次挑戰3個鐘機程去新加坡!

因不想太過影響小B的作息時間, 我們選了午機去午機返, 變相少了一天~~ 5日4夜的行程, 帶著小朋友, 行程也都不敢安排得太豐富, 每天一個景點都夠哂啦~ 所以我們最後去過的地方不多, 但都天天精彩呀!

今次坐Singapore Airline~ 大個左咩都話要自己做, 上機時要自己拿機票!! 坐定後就狂玩遙控~~

優先享用飛機餐~ 食到好飽! 最正係有哈根大師雪糕... 忘了影相...

飛機上濕度低, 小B又面紅紅...

三個鐘機程轉眼便過~ 到市區已7時多~ 趕緊去今晚的酒店check in~

Swissotel The Stamford (網址: http://www.swissotel.com/hotels/singapore-stamford/)~ Through Expedia book 未連稅HKD12XX一晚~ 酒店就在City Hall MRT站上蓋, 樓下有大商場, 很方便!

Luckily我們被upgrade了住Grand room, 有separate sitting area 同兩個balconies... 可惜我忘了影相!!! >.< 因趕著衝去牛車水和在新加坡工作的朋友見面啊~~ 而且還有一項關乎我們行程的重要任務... 就是買之後幾天的門票!!

上網search過這間天X旅遊門票比較平, 陳老公計過total可慳大約HKD600~ 所以特地去買~ 可是原來他們收8點, 我們5時多才到機場, 未必趕得切...

 天X旅行社facebook page: https://www.facebook.com/skylinetravelsg

(photo source from internet)


感謝朋友及她的老公幫忙!! 打烊前幫我們買了票!!!

還請我們到牛車水Maxwell Centre吃晚餐~~~ ^3^~~~

除了出名的天天海南雞外, 原來其他店也不錯! (因為8時多天天已打烊...) 今次我們吃的海南雞也很美味... 但忘了是那家店的~ =P

煎蠔餅~ 初時還以為是釀蟹蓋~~ XD

這個是印尼東東.... 開胃好味... 小草已忘了它的名字... =P























小B選了個魚蛋河~ KO了一大半~ 味道不錯! 還有蔗汁, 西瓜做飯後甜品...

跟朋友兩公婆聊了一晚, 11時多才回到酒店~ 趕緊梳洗沖涼睡覺, 因為明天還要早起呢~~

(To be continued...)

比翼雙飛 - 結婚賀卡~

今年1月1日晚連夜趕起的作品, 祝賀大學同學1月2日的大婚之喜~
(說起來, 那晚之後直至現在都沒再做過手作... ><)

賀卡主角是一對通花大蝴蝶~
由於花紋較精細, 過了很多次機才完成... 想不到這部分最花時間~

















牛油紙造的祝福語是以前的存貨~
所以其實這張卡算做得很快了~ 加幾粒閃石, 完成!

買被記 - Sophia the First的啟發

話說小B睡的BB床都已頂頭頂腳, 而且也是時候讓他擁有自己的房間, 所以農曆新年前添置了一張新床給他~

有新床順便買新被~ 經過JUSCO見到有折, 便讓他自己選卡通珊瑚被~

卡通公仔有4款: Toy Story, 怪獸公司, Sophia the First, 同近年hit爆的Frozen~

我自己是想買Toy Story的~ 一來陳老公喜歡三眼仔, 二來男孩子都會用Toy Story或怪獸公司吧~

懶民主的我又問下小B意見...

怎料, 小B竟說要Sophia the First!! -_-"""

不是嘛, 男仔之家用公主被.......

不信邪, 估計可能是他亂選... 過了一會再問他, 他仍是要Sophia the First, 還要愈問愈堅決!! -___-

再問他原因, 為什麼選公主? 他很清晰的表達: 「我係電視見過呀~~!!」說時都幾肉緊...

啊... 原來電視影響力真的好大!! 只是偶然星期日在明X台看過的卡通片而已...

又... 原來我們竟然沒有給他看Toy Story卡通?! 失策失策~~

又又... 其實小B還沒有「男仔的」「女仔的」概念, 對他來說, 這是一個他熟悉的卡通人物而已... (幸好沒有選Frozen... ><)

事已至此, 媽媽只好乖乖付鈔~~~

就是一張類似這樣的公主被~~

買完小草不禁想...

1. 真的, 三歲不夠的人仔, 已經開始有自己的想法...

2. 小草自以為是一個開通媽媽, 卻原來連阿仔用一張「女仔」被都接受不了...

3. 這是一個很大的提醒與學習啊!! 要學習尊重子女都是獨立個體, 他會有自己的想法, 而當他的想法跟我們不一樣時, 我們更需要學習接受和放手!!

寫下這些做個記錄, 希望能給將來的自己一個提醒~! 莫忘初衷!!

羊年年花~

結婚後, 除了陀B那年不敢去花墟迫之外, 每年農曆年都會擺年花, 加添節日氣氛~

今年的年花走清雅高貴路線~ 熟知小草手作作品風格的朋友應不難發現, 大紅大橙七彩繽紛通常都較少出現~ 連年花都這麼貫徹~ 哈哈... XD

走遍整個花墟, 眼見很多花都很美, 只是都不知怎麼插才好, 拿上手都沒有靈感... 最後才看上這深紫色小牡丹~ 有了主花的基調, 配襯就不難~

買了花, 生手的我又花了一晚來插... ><

幸好出來效果都不錯~ 大家喜歡嗎? =] (當然仍舊是缺了農曆新年的喧鬧感, 但其實小草更喜歡清雅的! =P)






















祝大家花開富貴! 龍馬精神!

壓軸是小B賀年照一幀! 羊年蒙福!! ^0^