小B考小一。Happy Problem

Date back to 22.1.2018

其實呢個date back都唔太準確... XD 事關都擺左一排先有時間記錄下...

依家係P校同F校之爭...

其實好明顯, 有睇開前文都估到, 小草係心儀P校既, 但點解都仲有煩惱呢?

最大問題咪就係$$...

其實P校以私校黎講, 真係唔算貴, 但唔貴唔代表唔使諗嘛...

畢竟小草同陳老公只是普通打工仔一名... 一讀六年, 其實係影響整個家庭規劃...

再者, 仲要諗埋阿妹~ 阿妹又要玩多次小一遊戲...

就算阿妹入到, 又係$$$$...

仲要預佢學費年年加...

真係要從長計議, 諗清楚先決定架...

而且仲有其他因素...

黎個P校 vs F校先...

1. 學校style
P: 愛心學校, 宗教氣氛濃, 小草心儀, 估計學校氣氛好岩小B
F: 一般津校feel, 無咩特別
P勝

2. 教學模式
P: 傳統大班教學, 相信小B要時間適應
F: 合作教學, 唔催谷~ 適合小B~ 小班教學模式, 但去年開始要加額, 唔知小班模式可否維持
F勝

3. 地點
P: 近!! 慢慢行, 十分鐘唔使就返到學校~ 小B 7:15起身時間都鬆動, 對於渴睡既小草, 真係好吸引
F: 車程幾個字, 預埋等車7:10要出門口, 即小B 6:45一定要起身 (即媽媽要更早起身!), 即使改搭校車, 時間都係差不多
P勝

4. 校舍
P: 細, 舊, 工程進行中, 2019年先完成第一期, 有工程就真係麻麻地
F: 千禧校舍, 新淨, 唔係特別大但係正常size
F勝

5. 上堂時間表
P: 一三五下午係興趣班 + 一個鐘導修堂, 應該可以做左大部分功課先返屋企, 正! 有埋課外活動, weekend既興趣班可以慳返, 多D時間hea或出去玩~
F: 星期三下午係聯課活動, 每日25分鐘導修堂, 可以執下書包寫下手冊都好~ 興趣班就要係weekend學~
P勝

6. 功課量
P: 唔多, 甚至可以話係少
F: 唔多
和

7. 其他要求
P: 人人要學樂器, 計入音樂分
F: 無咩體藝要求
umm... 各有各好, 和啦~

8. 升中情況
P: 畢業生升Band 1中學率中規中矩, 有3成, 加埋升Band 2頭既%, 有5成
F: 升Band 1有3成1, 當中不乏響噹噹既名校~ 但剩餘既同學多數入Band 2中下甚至Band 3中學, Band 1+Band 2頭, 3成8左右
呢樣要睇家長對子女期望D咩... 所以, P勝

9. $$
P: 書簿費, 雜費, 午餐費外, 再加學費, 可以慳既只係車錢
F: 間間學校都要俾既書簿費, 雜費, 午餐費, 好處係學費免費, 最多俾埋校車錢
F大勝呀!

10. 弟妹入學
P: 聽聞會加分, 但唔係必收, 如果第時唔收阿妹, 唔知我會唔會超後悔... XD
F: 必收生, 妹妹入硬唔使煩
F又係大勝!

11. 返學安排
九月妹妹都N班開學了, 返學點安排都係一個考慮!
P: 送完小B, 可以係附近同陳老公會合, 我再湊妹妹返學 OR 帶埋妹妹一齊送哥哥返學, 之後我再送妹妹 OR 陳老公送哥哥 +我送妹妹... etc... 總之其中一間學校夠近, 好多option都可行
F: 帶埋妹妹一齊送哥哥返學, 然後妹妹再返學, 即妹妹都一定要6:45早起~ OR 同陳老公分別送兩兄妹去同一個location返學... 只係一個早一個晏少少, 咁妹妹先可以瞓晏DD...
P勝

12. 放學安排
P: 婆婆 / 姐姐要走兩間學校, 一個東一個西, 好在接完哥哥返去, 可以慢慢再接妹妹
F: 兩間學校係附近, 婆婆 / 姐姐可以走一轉接哂兩個... 但, 哥哥小學放3點幾, 妹妹放4點幾, 即係哥哥一係係街等妹妹, 咁似乎好嘥時間... 一係哥哥返屋企先, 但接放學果個就好頻撲, 返完去就即刻要再出來...
和~

P五勝 對 F四勝, 但F四勝裡面有兩個係大勝, 你話係唔係難揀... ><

小B考小一。等待過後...

Date back to 8.12.2017

小B考完P, R, S三間私小之後, 就係漫長既等待...

PRS三間中, 小草最心儀P校, 見我連聽講座都眼濕濕就知...

P校, 10月中考, 一take過, 兩星期後11月頭就放榜, 算好快~! 但快得黎都係好漫長...

記得小B in完P校笑哂咁, 雖然唔預有offer, 但心中仍希冀會有奇蹟出現...

P校放榜前一晚, 小草都瞓得唔好 + 不斷發夢... check結果 > 唔收 > 醒左 > 瞓返 > 又check 結果 > 都係唔收 > 又醒左... 無限loop到天光...

原來我心底裡真係好大期望... >.<

放榜果朝仲要開會, 只能成朝心不在焉一有機會就係咁refresh電話個mail box... 簡直覺得自己有少少obsessive...

跟住, 見到小B幾個玩開既同學陸續係自家whatsapp谷報喜, 心情開始激動!!

因為... 估唔到我地讀學劵幼稚園又唔谷既小朋友都會得到私小青睞... 同時, 真係好想好想快D收到通知, reject都好, 因為等... 實在太煎熬嘞............... X{

Refresh左成朝都係無消息... lunch time時灰爆之下就打俾陳老公呻下... 但原來呢D野, 男人真係唔會明... 陳老公覺得小B總會有書讀, 咁擔心做咩?! 當堂吹到bear一聲 -_-"...

同同事等位食飯時, 仍然繼續obsessive地refresh refresh and refresh... 終於, 見到mail box有新email!

同事見我面色有變, 問我咩事... 我竟然當堂喊左出來... >< >< ><

大家明唔明果種激動既心情!!!!

我仲要其實係咩內容都未睇到, 就已經喊左......!

我即刻行開匿埋一二邊睇清楚個email, 一路睇一路喊... 水喉開左閂唔到...

收左! 收左!! 竟然係收左!!!

依家寫返出來都仲係想喊... 嗚....嗚... 嗚...

然後喊住係阿仔既相熟同學whatsapp谷報喜, 係遠方既家長好友又陪我一齊喊.... =~(

之後, 先喊住打俾陳老公...=~(

陳老公收到call, 都略略地不耐煩 (因為幾分鐘前先俾個老婆狠狠地罵完再收線... XD), 聽到小B有offer, 真係O哂咀... 仲問我個仔面試究竟做左D咩?! umm... 我都好想知佢做左D咩啊...

情緒平伏過來後, 就返去join返D同事啦... 同事問我, 點呀? 佢地一問我, 又忍唔住爆喊... -_-""" 天呀, 我究竟咩事?!

由於情緒太激動既關係, 我lunch時連野都食唔落...XD

結果, 我keep住呢個難以置信時而激動時而興奮又時而感動既起伏心情, 足足一整個下午...

跟住11月中同尾接連收到R同S校既reject, 其實都唔緊要了, offer都真係一個就夠嘞~ 有時無得揀唔使煩其實都不是壞事...

點知, 神就係有得俾我揀...!

11月27號, 自行放榜既日子...

送完阿仔返學, 經過F校, 等多幾分鐘(九點先公佈), 等學校開門入去睇結果~

學校除左有申請編號, 仲列埋學生名字出來~

最初我主力睇最尾果兩行, 諗住有都唔會排得前(假設學校按抽獎先後次序列出來...), 睇左幾秒唔覺有... 點知, 係中間果行一眼就見到小B個名!

中埋!! 今次點揀好呢...??

一輪struggle, 開心的抉擇, 到呢一刻我都仲未決定到... ><

唯有衰仔地兩邊都註哂冊先... ><

始終一讀六年影響深遠, 仲影響埋阿妹, 所以迫不得已才出此下策...

無論如何, 我大抽獎出結果前點都會放返個位出來, 等人多個機會叩門又好求位又好啦~~

下篇再講點解咁難揀....

小B考小一。自行。私小

Date back to 1.12.2017

一直都想記低呢幾個月既「過山車之旅」... 講緊係心情起伏尤如坐過山車... -_-" 直至依家先有空間寫低...

繼6月小B去左兩個interviews後, 小學都放暑假, 大家都可以停一停抖下...

至於果兩間學校既結果... 當然係唔得啦... 其實都無預過得... =P

到9月份, 呢個小一大作戰先真正開始!! 好多直資私校呢個時候先報名同interview~~ 小草一心想抽津校, 所以都報私小多, 因為通常私小都會俾抽獎...

而同時, 9月尾已經要交自行報名申請表~~ (時間真係過得好快...)

所以9月10月係不斷既學校簡介會、交表、報名，然後係面試... 好似個個weekend都係做呢D野...

先講自行...

感恩小草有宗教分, 所以津校都有一堆可以選擇...

一直心儀隔離網A小學, 早在三月時同小B一齊去聽簡介會同Open Day, 佢去上模擬課...

聽完既感覺係... A小學好好, 但未必啱小B...

有朋友既小朋友讀呢間小學, 朋友問小B鍾唔鍾意間學校, 小B答「諗下先...」, 我呢個做阿媽既就知... 即係佢唔鍾意囉~ XD

所以自行係揀左A小學...隔離既F小學~ 事關小B去完佢Open Day成日話鍾意間學校...9月聽完F小學既簡介會, 感覺OK, 似乎都啱小B既... (但未至於覺得「係佢啦」既感覺), 而且亦無咩其他更想入既 (呢個先係重點!), 所以自行就報左佢... 靜待27/11出結果~

好嘞, 到私小...

考慮完地點學費教學理念後, 會報既只有3間, 分別係P校, R校同S校~

呢3間學校, 小草都去哂Open Day簡介會做哂功課~

當中最深刻係P校, 學校簡介會太多人報名, 要借用學校隔離教會既禮拜堂(其實間間學校既簡介會都係咁多人!)... 果晚人多, 我同陳老公只能坐上層...

呢個簡介會竟然多次令我聽到眼濕濕(始料不及), 但要死忍住唔喊(邊有人聽簡介會會聽到喊架?!), 心諗原來依家仲有一間咁有愛心咁好既小學... 我望住前眼前既景象, 坐無虛席, 第二個念頭係, 咁易考到咩...?! 再望住遠方既十字架, 我心裡係祈禱求神帶領, 為小B安排合適既學校...

10月同11月就係面試既日子...

先係P校... 小B隔左幾個月無面試, 好在都唔太抗拒再去面試... 只係佢都問過下點解要面試...

P校超近小草屋企, 面試果日行去十分鐘唔使...小B覺得間學校咁近真係好正... XD (事關佢返幼稚園都要搭幾個字車) 見佢狀態似乎唔錯...

登記完佢自己入左去之後, 我就係另一個課室等叫名接返佢...

P校校長好有心, 派左俾家長每人一封信, 睇完又係眼濕濕果隻... XD

之後坐左十分鐘都唔夠就叫小B個名... 真係櫈都未坐暖就IN完... 即刻心諗, 凶多吉少啦... 但都要笑住出去接佢...

見佢IN完都好開心, 我仲問佢係唔係全部小朋友都一齊出左黎呀... 佢話係, 不過有一兩個仲未出來... mm... 咁小草心裡有數... -_-"

小B仲話我知老師話佢住得好近... 佢都仲係好開心~~~ 但就唔再講老師問左D咩嘞... well, 佢既習性通常唔識就唔講...咁囉...

對於佢再次順利完成面試, 小草都滿意架嘞...

傾傾下已經行到返屋企~ 成個面試過程由出門口到返到屋企, 只係用左半個鐘!!!

到R校, 面試係陳老公帶去, 佢話小B in完出來係目無表情... 呢間主力都係考學術, 睇佢都又係唔識既多... -_-"

其實都預左, 無谷既小朋友就係咁, 只係佢唔好怕左去面試就好~~

到S校, 咁岩佢同個同學一齊考, 兩個人仲要同組一齊入課室, 可能同好朋友一齊, 成件事應該好happy, 考左成個鐘先出來都仲係好開心... 當然, 佢仍然係唔會講你知係入面做左咩... -_-""

眨下眼就到各校出結果既日子... (依家寫就覺得係眨下眼, 但其實係等到天荒地老覺得不如你reject我就快唔好要我等我就快爆嘞...既心情... 等過就會明...XD)

待續...

小B考小一

Date back to 28.6.2017

好似先寫完N班大作戰無耐, 依家又話考小一...

識左呢個仔咁耐, 都大約知道佢讀書係咩款式~ 活動教學應該比傳統學校適合佢... 唔太谷, 要有空間要包容要俾時間佢成長進步既學校... 有幾多間?

兔龍年出生率高, 要抽到心儀學校真係難過登天... 所以早係小B K1時我已開始斷斷續續做資料搜集~

直私就點都要考下, 唔預有offer, 只係預將來真係要叩門時都無咁慌...

剛過去既6月就考左兩間... 一間私立一間直資...

其實要一個咁細既小朋友離開父母係一個陌生環境獨自入課室面試真係唔容易... 唔係個個小朋友都做得到...

而小B本身由細到大都係一個痴媽B, 係學校既自信主動健談, 去到陌生地方就無哂...

上年年尾同過小B去參觀小學, 期間有D環節係小朋友去上模擬課, 家長聽講座... 痴媽B死也不肯離開我半步....其實都係預左既...

所以早係半年前就開始同佢灌輸下考小學既訊息, 而學校老師可能見佢地都大, K2開始已經叫佢地學識獨立因為要上小學etc...

而呢個仔亦得意, 雖然佢係痴媽B, 但亦有自己主見同想法, 多次提出要自己揀小學... -_-""

4月份去參觀另一間小學時, 我就用呢個理由「自己揀小學」黎遊說佢要去上模擬課, 去感受下體驗下, 先知適唔適合嘛~ 今次, 小B終於肯自己跟小學老師去上模擬課! 我相信呢次係轉捩點, 亦俾到個成功經驗佢 -- 離開父母係小學上堂唔係一件恐怖既事~~~

到6月考第一間小學...

考之前感覺佢都輕鬆, 笑住入去再笑住出來...

考完後就感覺佢係扮輕鬆, 一出來我咩都未問(亦唔打算問)就同我講話識哂.... 我心裡當然唔信, 但都有回應佢同讚賞佢...

返到屋企佢既情緒先出... 比平時hyper, 玩得癲過平時好多, 又唔聽大人講野... 我知佢有D野... 同佢傾下, 佢真正既情緒就黎... 其實佢係唔開心, 因為頭先唔識... 我一直都同佢講唔識唔奇, 盡力就得... 我話交俾神啦, 神會安排間適合既學校俾佢...

真心覺得佢可以順利咁考完已經好好好叻!

第二日佢就正常返~

6月尾考第二間...

今次, 係考之前, 已經感受到佢既不安... 佢都自己出聲話好緊張, 個人都忟忟地同好易喊~

呢間一入去登記完就"被分開", 我都未黎得切反應, 阿仔已經要自己行開, 但見佢蹦蹦跳咁上樓梯, 似乎雖然緊張但係都ready~

考完出黎佢直情輕鬆哂...

今次主動講多左考左咩, 又係話自己識哂... well...

之後兩晚既pillow talk都同我講話好鍾意呢間學校, 老師好溫柔, 想入去讀喎...

我心諗, 我都想你考到呀阿仔...但, 人地收你先算啦...

雖然呢個小一大作戰先剛開始, 但真正感覺果種壓力... 好想時間快D過, 快D知道結果... 雖然唔預有offer, 但等, 真係最煎熬...

可以想像如果到時大抽獎, 壓力更加不得了...

叩門... 更加唔敢諗...

玩完呢一年, 應該大人細路都成長不少, 抗逆力都提升不少...

教會插花

小草間唔時都會係教會做下插花事奉, 相比起其他事奉崗位, 插花算係彈性較大, 岩我呢D要湊兩個細路既媽媽~~

曾經我都只係敢玩絲花, 絲花點搞都得... 畢竟真花有生命, 俾我摸來摸去都搞唔掂, 真係殘哂都未插完...

上年有日教會有位姊妹邀請我幫手插花, 插唔難, 插之前點樣預備, 仲有買咩花, 呢樣先難... 仲要教會插花有budget限制~ 於是我跟左兩位expert姨姨去買過一次花, 之後就膽粗粗自己黎嘞...

自己黎既結果, 當然係有好多哈碌野... 講到尾都係經驗唔夠~~ =P

第一次插花... 當時剛剛有左小小B, 但又唔想唔插... 仲記得果時自己成日反胃, 於是沖埋果皮水出去花墟一路買花一路飲...

仲有花淨插多盆細既...

哈碌野: 繡球花好靚! 但貪隻色靚買左呢隻大陸品種... 真係星期六插完佢都已經謝謝地, 唔知點捱到星期日... 感恩expert姨姨出現, 教我果晚成枝花反轉浸落水, 俾佢飲一晚水, 第二朝返黎再插返落盆, 希望救到...
仲有就係, 插到一半先發現個花盤係裂裂地既... -_-""

果晚真係訓唔著... =P

第二朝返到黎expert姨姨已經幫我插返D花上去... 雖然有一棵都係救唔到, 但overall都叫做頂到下...

姨姨插完既樣~

第二次插花, 果時小小B都4,5個月... 無再反胃, 但就要陳老公出黎花墟做咕哩幫手拎花...

哈碌野: 個花器係籃黎既, 所以用左包書膠墊住裡面... 我竟然就黎插完時, 篤穿左張包書膠... -_-"" 於是成晚就用毛巾墊住個花盆底...

都未算... 唔夠經驗既我, 淨係識用鐵線fix果D藤蔓, 結果佢就塌左...

第二朝返黎我都唔知佢塌過, 淨係覺得盤花好似唔同左... 原來又係有expert姨姨同我救火, 用木筷子fix左... 原來木筷子先夠力...

姨姨救完火既樣~

跟住個肚愈來愈大, 太攰都無插嘞...

到小小B 6個月大時, 我先復出...

太耐無插唔知點搞好...

今次仲要帶住阿仔去買花... 買左兩個鐘, 阿仔悶到自己係度唱歌... XD (咁我又好欣賞佢如此有耐性~~~)

仲要果日係假期, 花墟多人, 依家一有多人既地方我就拖到D小朋友實一實, 始終香港已經唔同左, 都係小心D好...

所以佢係度都令我幾分心, 買下買下又買返繡球...

今次醒左, 買荷蘭種, 花莖較硬既...

由於買果時個心都亂... 今次插出黎都唔太滿意...

哈碌野: 我又再衰係繡球花上!!! 始終天氣太熱, 人都溶啦, 何況花.... (因為我地星期六插完花, 唔會咁奢侈俾D花涼冷氣到星期日架...)

一個月後, 又再插多次...

成日都想插D夏日繽紛色調既花... 但自己買下買下又會去返粉色系, 或者同一個色tone既花...

同埋感覺上最難既係, 就算你心中盤算好要買咩花, 去到往往都無... 就算有都可能唔新鮮, 又或貴到飛起... 所以每次買花都係驚喜~~

今次把心一橫, 買顏色sharp既, 新鮮既, 返去再諗點襯點插...

同埋, 以前往往被平日少見既花吸引左去, 唔想買D日見夜見既品種... 但偏偏愈common既花就愈平, 少見既咪貴囉~~

今次學識理性D, 主要睇價錢, 太貴唔諗, 花既顏色夠sharp又平先買...

結果...

今次算做無咩哈碌野, 無插穿張包書膠(因為個花器都係要用包書膠既~~), 無未插先謝既花(落左保鮮液係好好多!!), 甚至無out budget!! XD

又多得expert姨姨sss提點, 加左龍柳(curly willows), 出黎既效果好滿意呢~~~

原來我都handle到七彩既顏色~~ =)

感謝主讓我有呢個事奉崗位, 欣賞大自然之美之餘, 仲令我有所體會, 發揮自己~~

Handmade Vintage Album

呢本相簿由2011年開始做...

無迫切性(即係唔係送人既禮物)...

無特定對象(唔係為左阿仔阿女而做)...

再加上中間唔同projectsssss(無論手作定生Bs都係啦...)穿插...

終於...竟然...無啦啦係2016年7月既某一個晚上心血來潮完成左!!! 當時其實只係唔使湊小朋友一晚(好難得兼罕有!), 想搵返D手作做下就攞返出黎做......

做完真係大大大滿足呀!!!

 本身(幾年前一開始做果時...)係打算試深沉D既style既, 隔左一排做第三版, 都係忍唔住用D粉色系... -_-"

真係好鍾意呢個tag既花花pattern...

 跟住又隔一排, 玩返深沉又得喎~ 我仲要整完出黎都幾鍾意!

 呢朵花係N年前試個新PUNCH時整既, 估唔到終於用得著~

 好鍾意咁拼法~

跟住果版又變返粉色... 係囉, 因為又隔左一排... XD

 簡簡單單都幾靚~ 張紙既玫瑰花pattern先係重點~~

呢個機關係令到成本album厚到摺唔埋既主因~~ XD

睇左個面先...

 我用左好多心機架~

要開機關就係用呢條鎖匙~

 開左個「四面台」出來~ XD

最後果版, 又變返簡單...

有得做下都已經好過癮, 唔想開咁大個壇(有排執!), 所以都係簡單D算嘞~

 但其實都有D details位架~~

謝謝觀賞~~ =)

小小B第一次拍家庭照

千呼萬喚始出來既小小B~~~

扮下初生BB先~~

依家睇就覺得佢好細個, 好初生... 但真正既初生B真係未滿一個月架~ 你睇個籃都就黎裝佢唔住...

而其實佢係一路影一路郁身郁勢... XD 已經唔似得D初生B咁任人擺POSE... =P

果日小小B成朝都呆呆地咁, 可能都少出街~ 影左好多張先有一張笑下...

同下哥哥合照先~

又同 (圓碌碌既...)媽媽合照下先...

呢張相佢特別定, 對眼仲碌到好大... 因為....

佢辦緊大事!! XXDDD

之後我同陳老公要同阿女做善後正作, 再餵埋奶... 搞咁多野都要行開一段時間, 阿仔同攝影師哥哥熟左, 竟然唔做痴媽B, 寧願同攝影師哥哥玩! (又或係玩死攝影師哥哥至真... XD)

於是攝影師好多時都係影阿仔~~ XD

 D相多到好似阿仔獨家相集咁... XXDDD

仲要好CHOK下...

真係好多謝攝影師影到阿仔自然又咁有自信既一面~~

呢張陳老公用埋黎做FB profile pic!

可知道我識佢以黎佢都未轉過profile pic!!! 唔算好耐但都8年啦!! 我地D結婚相都唔足以令佢轉profile pic呀!! (係, 我呷緊醋~~ XXDD) 呢張相一出, 即轉~~!!! 係阿仔勁定攝影師勁呢...

阿仔影完寫真, 阿妹已經不省人事...

瞓著都影多張先收工啦~ XD

我地一家人既溫馨合照當然唔少, 不過係我未修身兼陳老公唔太想出鏡既情況下, 我就唔POST出黎嘞~ =P

------------------------------------------------------

影後感...

今次呢輯相係毫無壓力純粹去玩既心態咁影, 出黎效果好滿意啊~

阿仔開始大唔太鍾意被人影, 但就鍾意影人~ 為左令佢有D野玩同埋合作D, 所以俾左我部老爺傻瓜機佢玩~ 於是攝影師影阿妹時佢又跟衫尾一齊影... HAHAHA...

跟住到佢要俾攝影師影嘞, 佢就要人地猜贏佢先肯俾人影! 如果攝影師猜輸左, 就要做model俾阿仔影~ XD 所以... 我相機裡面都唔少攝影師既相... XXDD

估唔到既係慢熱既阿仔, 好快就同攝影師玩得好熟~ 亦都見到攝影師為左影阿仔好落力, 例如同阿仔玩賽跑但要跑得快過佢然後以9秒9趴係地下影跑緊既阿仔!!! 大家想像下就知個難度有幾高, 仲要唔止跑一次... 所以果D錢係抵俾架, 自己邊會影到呢D相~~~

講左咁耐, 其實阿攝影師係邊個呢? 應該好多blogger都知啦~

咪就係NT (http://www.iniley.com/) 囉~~~

佢既服務同質素絕對係物超所值既~~~ =)