小B K1觀課日

眨下眼又到一年一度既觀課日~

每次觀課只可以一位家長出席~ 上年我去左, 諗住今年俾陳老公去啦, 點知小B係都要媽媽去, 佢話我去完講返俾陳老公聽就得喎... -_-"

咁好啦, 今年又係我出動~

去到又係聽校長做個briefing先, 之後就入去課室啦~

入到去見到小朋友已經坐定定~

今日係講家居安全既主題課本「小皮球，小心啊!」, 做幼稚園老師真係要預備好多教材, 又手偶又道具咁~ 小小既情節都俾老師講到好生動, 小朋友反應都好好, 小B更加係非常有反應... 即係成日係個位到嗌個答案出黎, 仲要大大聲果隻... -_-"

講完故事之後, 就到分組討論時間~

開學時都聽過校長話佢地會有分組討論, 仲要做匯報... 完全想象唔到3歲幾既人仔做咩匯報呢? 我地真係嚴格黎講讀大學先第一次做匯報啊... 今次觀課有得見識下啦~~

小朋友每3個人一組, 每一組都用動物做組名, 小貓組小狗組etc.~

原來小B係小貓組, 唔怪得佢返屋企成日講咩小貓組, 熊貓組啦~~

每組又分左1號, 2號同 3號~ 老師每次都會安排唔同號數既同學做唔同既任務~

可能小B實在太鍾意講野, 老師都未話邊個做咩時, 佢又已經大叫「2號做匯報!」而今次, 老師又真係安排2號做匯報, 1號攞物資, 3號做記錄~ 當然, 小B自己就係2號啦~

今次討論既係一幅關於家居安全既圖畫, 小朋友要指出圖畫裡有咩危險既地方~

眼見1號同學攞左物資返黎, 小B已經第一時間搶左去睇... 但被搶既同學又無咩反應喎~ =P

到討論時間嘞, 佢地既"討論"係咁既...

小B指住幅圖畫同3號同學講左一個危險既地方(幅畫係有兩個危險地方), 講完就轉頭同1號同學(男仔黎...)玩~ XD

3號同學(女仔黎~~)圈住小B講既地方, 再諗左2秒, 又圈埋第二個地方~~

而1號同學攞完物資後係無參與過討論既.... XXDDD

實驗證明... 男仔隨意D, 女仔心思細密D~~~ XD

到匯報時間嘞, 老師先抽左小兔組匯報~ 小兔組匯報完, 老師問小朋友搵邊組匯報時, 小B又大叫小貓組~~~~

今次終於如佢所願, 真係搵左小貓組出黎! (做阿媽既當時真係既開心又緊張, 開心既係第一次睇到小B出黎對住咁多人講野, 同時又戥佢緊張啊~)

小B好興奮咁行出黎, 大大聲唔怯場咁介紹自己:「我係小貓組2號陳小B」~ 之後就匯報幅圖畫有咩危險既地方嘞~ 老師又問下佢俾佢補充下~

講完之後, 老師都會帶領全班拍手讚賞~ 今次有同學提議讚賞佢「非常好」, 於是老師就帶領全班拍手一齊講「非常好」, 小B俾人讚完後, 笑咪咪鞠躬好可愛咁講「多謝大家讚賞」~ 睇到個個家長笑左出黎~~ (做阿媽既除左鬆一口氣外, 對住呢個裝可愛既阿仔, 表示有D頂佢唔順... XXDDD)

觀課完嘞~ 校長同老師俾時間我地問問題~

我即刻問老師, 小B平時係唔係都係唔舉手就講野, 兼講野大大聲既呢? 老師話佢平時都係咁... @@ 但佢地好鼓勵老師同小朋友之間既活動, 所以係位到叫出黎無問題, 上K2先會要佢學先舉手後講野...

觀課後感:

- 原來小B唔止係屋企講野大大聲, 平時返學都係...

- 係我眼中小B既dominant表現(1號同學攞左物資返黎, 小B第一時間搶左去睇...),係其他同學眼中又無咩所謂... 阿1號同學仲friend到成日挨左落小B度, 小B又OK喎... 哈哈哈~ 小朋友既世界真係同大人唔同!

- 最surprise係小B對住咁大班家長都咁淡定, 真係估佢唔到... 俾我一定唔敢出去...

- 原來自己小朋友表現好, 家長真係會有飄飄然同面上貼金...既感覺架!! 當然, 我亦知道小B講野叻既同時亦有其他弱項, 例如數理啦, 大肌肉活動啦... 要數真係下刪一千字... 數都數唔哂... 所以當其他家長覺得小B好可愛既同時, 都真係有苦自己知... =P

- 每個小朋友都係獨特既~ 只不過咁岩小B講野叻而又俾其他人睇到而已... 至於佢既弱項...做家長唯有接納佢, 鼓勵佢同幫佢, 千萬唔好將佢同其他小朋友比!

手作。小B相簿

係, 你無睇錯我無打錯, 的而且確係小B既相簿~

呢本相簿由陀住阿仔時開始整...

跟住一直整 (實情係"拖") ...

終於係上年, 小B 3歲生日前整好!

又... 我一直拖... 無影過相無POST過...

事隔又一年, 終於POST出黎啦...

成件事差不多搞左5年... -_-"""

好在D紙無發黃... XXDDD

突然開TURBO整好佢, 應該係知道有小小B出現後, 先下定決心完成佢~ 因為都想做一本俾阿女~

所以, 下次就POST阿女果本出黎~!

依家睇下呢個"舊作"先~~

封面可以插相~ 

封面裡, 有tag可以寫BB資料~

第二版, 小B既小小腳印~

當年相簿未完工, 已經攞呢版蓋左腳仔印, 當時應該得十幾日大~ ^^

呢版原意係打手印既, 但因為怕佢食手, 用完顏料始終怕洗唔乾淨, 所以後尾決定都係影相代替...

呢版應該係放同爸爸既合照...

跟住就到媽媽...

沖涼相...

呢個設計可以放好多張"浴照"都得~ XXDD

可愛既tags~

放瞓覺相~~

玩既相...

當年做完之前果版就停左好耐好耐...

再攞返出來整時, style唔同左!!! @@

所以有D野, 都係一氣呵成好...

色彩繽紛咁埋尾~~~

封底既小袋子可以放下野, 例如BB住院時既手環腳環啦, 乾左既臍帶啦~~