1 December 2017

小B考小一

Date back to 28.6.2017

好似先寫完N班大作戰無耐, 依家又話考小一...

識左呢個仔咁耐, 都大約知道佢讀書係咩款式~ 活動教學應該比傳統學校適合佢... 唔太谷, 要有空間要包容要俾時間佢成長進步既學校... 有幾多間?

兔龍年出生率高, 要抽到心儀學校真係難過登天... 所以早係小B K1時我已開始斷斷續續做資料搜集~

直私就點都要考下, 唔預有offer, 只係預將來真係要叩門時都無咁慌...

剛過去既6月就考左兩間... 一間私立一間直資...

其實要一個咁細既小朋友離開父母係一個陌生環境獨自入課室面試真係唔容易... 唔係個個小朋友都做得到...

而小B本身由細到大都係一個痴媽B, 係學校既自信主動健談, 去到陌生地方就無哂...

上年年尾同過小B去參觀小學, 期間有D環節係小朋友去上模擬課, 家長聽講座... 痴媽B死也不肯離開我半步....其實都係預左既...

所以早係半年前就開始同佢灌輸下考小學既訊息, 而學校老師可能見佢地都大, K2開始已經叫佢地學識獨立因為要上小學etc...

而呢個仔亦得意, 雖然佢係痴媽B, 但亦有自己主見同想法, 多次提出要自己揀小學... -_-""

4月份去參觀另一間小學時, 我就用呢個理由「自己揀小學」黎遊說佢要去上模擬課, 去感受下體驗下, 先知適唔適合嘛~ 今次, 小B終於肯自己跟小學老師去上模擬課! 我相信呢次係轉捩點, 亦俾到個成功經驗佢 -- 離開父母係小學上堂唔係一件恐怖既事~~~

到6月考第一間小學...

考之前感覺佢都輕鬆, 笑住入去再笑住出來...

考完後就感覺佢係扮輕鬆, 一出來我咩都未問(亦唔打算問)就同我講話識哂.... 我心裡當然唔信, 但都有回應佢同讚賞佢...

返到屋企佢既情緒先出... 比平時hyper, 玩得癲過平時好多, 又唔聽大人講野... 我知佢有D野... 同佢傾下, 佢真正既情緒就黎... 其實佢係唔開心, 因為頭先唔識... 我一直都同佢講唔識唔奇, 盡力就得... 我話交俾神啦, 神會安排間適合既學校俾佢...

真心覺得佢可以順利咁考完已經好好好叻!

第二日佢就正常返~

6月尾考第二間...

今次, 係考之前, 已經感受到佢既不安... 佢都自己出聲話好緊張, 個人都忟忟地同好易喊~

呢間一入去登記完就"被分開", 我都未黎得切反應, 阿仔已經要自己行開, 但見佢蹦蹦跳咁上樓梯, 似乎雖然緊張但係都ready~

考完出黎佢直情輕鬆哂...

今次主動講多左考左咩, 又係話自己識哂... well...

之後兩晚既pillow talk都同我講話好鍾意呢間學校, 老師好溫柔, 想入去讀喎...

我心諗, 我都想你考到呀阿仔...但, 人地收你先算啦...

雖然呢個小一大作戰先剛開始, 但真正感覺果種壓力... 好想時間快D過, 快D知道結果... 雖然唔預有offer, 但等, 真係最煎熬...

可以想像如果到時大抽獎, 壓力更加不得了...

叩門... 更加唔敢諗...

玩完呢一年, 應該大人細路都成長不少, 抗逆力都提升不少...

6 comments:

  1. 咁細個小朋友要承受咁大壓力,我地做父母真係好矛盾...

    ReplyDelete
    Replies
    1. 係呀... 木木都快要面對升小了~~ 講定"加油"先~!

      Delete
  2. 玩完幼稚園面試,已覺得好大壓力,唔敢想像小學會係點。
    加油,等你好消息。

    ReplyDelete
    Replies
    1. 龍年小學更大競爭, 的確係有D壓力, 唯有交俾神~~ =)

      Delete
  3. oh.. 時間太快, 又到了考小一了. 加油呀!

    ReplyDelete